ლევანდოვსკის პრეზენტაციას უფრო მეტი ადამიანი დაესწრო, ვიდრე თამაშების უმრავლესობას

დღეს "სპოტიფაი კამპ ნოუზე" რობერტ ლევანდოვსკის პრეზენტაცია გაიმართა, რომელსაც ბევრი გულშემატკივარი დაესწრო.

Mundo Deportivo-ს ცნობით პოლონელი ვარსკვლავის სანახავად სტადიონზე 57 300 გულშემატკივარი მივიდა, რაც "ბარსელონას" ისტორიაში მე-2 საუკეთესო შედეგია.

ამაზე მეტი, 60 ათასი გულშემატკივარი მხოლოდ ზლატან იბრაჰიმოვიჩის პრეზენტაციას დაესწრო. პოლონელმა ამ მხრივ მე-2 ადგილი ჩამოართვა ნეიმარს, რომლის წარდგენასაც "კამპ ნოუდან" თვალს 57 ათასი ადამიანი ადევნებდა.

საინტერესო ისაა, რომ ლევანდოვსკის პრეზენტაციას უფრო მეტი ადამიანი დაესწრო, ვიდრე გასულ სეზონში "კამპ ნოუზე" გამართული თამაშების უმრავლესობას. 2021/22 წლების სეზონში "ბარსას" საშინაო არენამ 25 შეხვედრას უმასპინძლა და აქედან თოთხმეტს უფრო ნაკლები დამსწრე ჰყავდა, ვიდრე რობერტის წარდგენას.

დღევანდელი პრეზენტაციის დასწრება "ბარსას" სეზონის საშუალო დასწრებასაც უსწრებს. 2021/22 წლების სეზონში "ბლაუგრანას" საშინაო შეხვედრებს საშუალოდ 53 982 ადამიანი ესწრებოდა და ეს ქვეყნის მასშტაბით საუკეთესო შედეგი იყო.

როგორც ჩანს, გულშემატკივარი "კამპ ნოუსკენ" მობრუნდა, რაც ძალიან მნიშვნელოვანია როგორც სპორტული, ასევე ფინანსური თვალსაზრისით.