ქალთა ფეხბურთი: მორიგი გასეირნება ელ კლასიკოში

"ბარსელონას" ქალთა გუნდმა მორიგი "ელ კლასიკო" მოიგო და ამჯერადაც მარტივად. შეიძლება ითქვას, მოსალოდნელზე მარტივადაც კი.

"ბარსელონა" "რეალ მადრიდთან" თამაშს დიდი დანაკლისით შეხვდა. სხვა 6 ფეხბურთელთან ერთად კატალონიელებს ოფიციალურად მსოფლიოს საუკეთესო ფეხბურთელი ალექსია პუტელიასი და არაოფიციალურად მეორე საუკეთესო ფეხბურთელი კაროლინ ჰანსენი არ ჰყავდათ. გასულ სეზონში "ბარსამ" მადრიდელებთან ორ მატჩში ცოტათი იწვალა, მას შემდეგ კი "ბლანკოსი" გაძლიერდა და ევროპული დონის გუნდად იქცა. იყო მოლოდინი, რომ დღეს "ბლაუგრანას" ცალი ფეხით მოგება გაუჭირდებოდა, მაგრამ არ გასჭირვებია,

ხონათან ხირალდესის გუნდი დიდ უპირატესობას მთელი თამაშის განმავლობაში ფლობდა და კითხვის ნიშნები არასდროს დაუტოვებია, ანგარიშის გახსნა მე-4 წუთზე მოახერხა, საბოლოოდ კი 4-0 იმარჯვა. თუმცა ჩვენი გოგონები მადრიდში 4-0 მოგებით ნამდვილად ვერ გაგვაკვირვებენ.

8 ტურის შემდეგ 8 მოგებით "ბარსელონა" ესპანეთის ჩემპიონატს დამაჯერებლად ლიდერობს, "რეალ მადრიდი" კი, რომლისთვისაც ეს პირველი წაგება იყო, 7 თამაშში 16 ქულით მეხუთეა.

რეალ მადრიდი - ბარსელონა 0-4

ბარსელონა (4-3-3): პანიოსი, ბრონზი (ტორეხონი 84), პარედესი, მაპი ლეონი, როლფო, ბონმატი, უოლში (ენგენი 75), გიხარო, ჩრნოგორჩევიჩი (პარალიუელო 63), ჯეისე (ოშოალა 75), პინა (ლოპესი 84).

გოლები: 0:1 ჩრნოგორჩევიჩი  4, 0:2 გიხარო 43, 0-3 ბონმატი 52, 0-4 როლფო 81.