მილანს სერჟინიო დესტში €20 მილიონის გადახდა არ სურს
სერჟინიო დესტი "ბარსელონაში" აღარ ითამაშებს, რადგან ის კლუბის გეგმებში არ შედის, თუმცა ჯერ კიდევ გასარკვევია, ამერიკელი მომავალ სეზონში სად იქნება.
La Gazzetta dello Sport-ის ინფორმაციით, "მილანს", სადაც დესტი ამჟამად იჯარით ასპარეზობს, მისი €20 მილიონად გამოსყიდვა არ უნდა და "ბარსასთან" თანხის დაკლებაზე მოლაპარაკების გამართვას აპირებს.
სერჟინიოს იტალიაში დიდი სათამაშო დრო არ აქვს, თუმცა "როსონერის" მის კვალიფიკაციაში ეჭვი არ ეპარება. ამერიკელმა მსოფლიო ჩემპიონატზე კარგად ითამაშა, მაგრამ იტალიელები მიიჩნევენ, რომ მისი ფასი ძალიან მაღალია და ან გამოსასყიდის შემცირება სურთ, ან კიდევ ერთი იჯარა (რაც "ბარსელონას" გეგმებში არ შედის).
დესტმა, შესაძლოა, მომავალ ზაფხულში მნიშვნელოვანი შემოთავაზებები მიიღოს. "რომა" მისით დიდი ხანია ინტერესდება და ამასთან, ფეხბურთელის სიტუაციას 2 პრემიერლიგური კლუბი აკვირდება.
"ბარსელონას" პოზიცია ნათელია - დესტი ზაფხულის სატრანსფერო ფანჯარაზე აუცილებლად უნდა გაიყიდოს და არანაირი ფასდაკლება არ განიხილება. ბაზარზე ბევრი კარგი მარჯვენა მცველი არ არის და კატალონიურ გრანდს სურს, ამერიკელში გადახდილი თანხა უკან დაიბრუნოს, შესაბამისად, ისინი ტრანსფერიდან €20 მილიონის მიღებას გეგმავენ.
ამ სიახლეზე კომენტარები გათიშულია.
კომენტარები [ 10 ]