მესი ბარსელონას შორდება და ინტერ მაიამის უახლოვდება
ბოლო წუთებში გავრცელებული ცნობების თანახმად ლიონელ მესის "ბარსელონაში" დაბრუნების შანსები შემცირდა, ხოლო მისი "ინტერ მაიამიში" გადასვლის შანსები მნიშვნელოვნად გაიზარდა.
გუშინ ლა ლიგამ "ბარსელონას" ფინანსური გეგმა დაამტკიცა, მაგრამ სანამ კატალონიური კლუბი ლეო მესისთვის გარანტიების მიცემას შეძლებს, საჭიროა, "ბლაუგრანამ" ფეხბურთელები გაყიდოს, რაც ადვილი საქმე არაა, მესის კი გადაწყვეტილების მიღება ეჩქარება.
არგენტინელი ჟურნალისტის, ვერონიკა ბრუნატის ცნობით ბოლო საათებში "ინტერ მაიამის" მესისთან მოლაპარაკებებში დიდი წინსვლა აქვს. ამერიკულ კლუბში ოპტიმისტურად არიან განწყობილნი და ფიქრობენ, რომ შეთანხმებასთან ახლოს არიან.
კატალონიელი ჟურნალისტი სებასტიან კადრელი მესის გარემოცვაზე დაყრდნობით იტყობინება, რომ ის "ბარსელონას" შორდება. მიზეზი ისაა, რომ "ბარსას" არ შეუძლია, ლეოს გარანტია მისცეს, რომ მის ლა ლიგაში დარეგისტრირებას მოახერხებს. იმავე ჟურნალისტის ცნობით მესის საუდის არაბეთში გადასვლის შანსებიც მცირდება.
ამ სიახლეზე კომენტარები გათიშულია.
კომენტარები [ 14 ]