შეთანხმება ვერ ხერხდება - ბარსა დემბელესა და პსჟ-ზე ზეწოლას ახდენს

უსმან დემბელეს "პარი სენ-ჟერმენში" გადასვლა გადაწყვეტილია, მაგრამ ჯერ კიდევ უცნობია, როდის დასრულდება ტრანსფერი. მიზეზი კი ისაა, რომ ფრანგი ფეხბურთელის წარმომადგენლები "ბარსელონასთან" ვერ თანხმდებიან.

"პარი სენ-ჟერმენი" მზადაა, დემბელეს გამოსასყიდი თანხა 50 მილიონი ევრო გადაიხადოს. ფეხბურთელის აგენტებს მიაჩნიათ, რომ ამ თანხის 50%, ანუ 25 მილიონი მათ უნდა შეხვდეთ, "ბარსას" კი მხოლოდ 25 მილიონი დარჩეს. კატალონიურ კლუბში კი მიიჩნევენ, რომ მათ მეტი თანხა უნდა შეხვდეთ.

იმ შემთხვევაში, თუ მხარეები ვერ შეთანხმდებიან, "ბარსელონას" უფლება ექნება, დემბელე 21 აგვისტომდე შეინარჩუნოს და Mundo Deportivo-ს ცნობით კლუბი ასეც მოიქცევა. ამ გზით "ბლაუგრანა" ფეხბურთელსა და პსჟ-ზე ზეწოლას მოახდენს. პარიზული გუნდისთვის საფრანგეთის ჩემპიონატი 12 აგვისტოს იწყება, მეორე ტურის თამაში კი 20 აგვისტოს იმართება. ფრანგებს დემბელეს დამატება ეჩქარებათ და არაა გამორიცხული, მის 21 აგვისტომდე გადასაბირებლად ისინიც და ფეხბურთელიც დათმობაზე წავიდნენ.

თუ პროცესი 21 აგვისტომდე გაიწელება, ამის შემდეგ პსჟ-ს უფლება ექნება, გამოსასყიდი თანხა გადაიხადოს და დემბელე დაიმატოს, თუმცა უსმანსა და "ბარსელონას" შორის 25 მილიონ ევროზე დავა გაგრძელდება. 21 აგვისტომდე კი ფრანგი კვლავ "ბარსას" საკუთრება იქნება.

დღეს "ბარსელონა" ამერიკული ტურნეს შემდეგ პირველ ვარჯიშს გამართავს და არაა გამორიცხული, საწვრთნელ ბაზაზე დემბელეც ვიხილოთ.