Golden Boy: მინუს გავი და პლუს იამალი

იტალიურმა Tuttosport-მა "ოქროს ბიჭუნას" ჯილდოს განახლებული სია გამოაქვეყნა.

საუკეთესო ოც ახალგაზრდა ფეხბურთელს შორის "ბარსელონადან" ერთი წარმომადგენელი დარჩა - ალეხანდრო ბალდე. სიაში ვერ მოხვდა გავი და ფაბრიციო რომანოს ცნობით ამის მიზეზი ისაა, რომ "ბარსას" ნახევარმცველმა ეს ჯილდო გასულ წელს მოიგო.

Golden Boy-ს ჯილდოზე სიახლე ის გვაქვს, რომ Wild Card-ით საუკეთესო ოცეულს კიდევ 5 ფეხბურთელი დაემატა. საუბარია იმ ახალგაზრდა ფეხბურთელებზე, რომლებიც საზოგადოებამ თავდაპირველი სიის გამოქვეყნების შემდეგ გაიცნეს. მათ შორის, რა თქმა უნდა, მოხვდა 16 წლის ლამინ იამალიც.

"ოქროს ბიჭუნას" 20 ფინალისტი: ჯუდ ბელინგემი, ჯამალ მუსიალა, ხავი სიმონსი, ანტონიო სილვა, ალეხანდრო ბალდე, ფლორიან ვირტცი, ბენჟამინ სესკო, ჯორჯო სკალვინი, რასმუს ჰოილუნდი, ლევი კოლუელი, იოჰან ბაკაიოკო, მილოშ კერკეზი, არტურ ვერმეერენი, ევან ფერგიუსონი, ლუკას გურნა-დუათი, ვარენ ზაირ-ემერი, უსმან დიომანდე, არნაუ მარტინესი, მატიას ტელი, ენდი დიუფი. ამ ოცეულს Wild Card-ით დაემატნენ: არდა გიულერი, ბილალ ელ ჯანუსი, მარტინ ბატურინა, ჟოაუ ნევეში, ლამინ იამალი.

"ოქროს ბიჭუნას" ჯილდო 2003 წლიდან თამაშდება. ყველაზე მეტჯერ, სამ-სამჯერ ის "ბარსელონასა" და "მანჩესტერ იუნაიტედის" ფეხბურთელებს მოუგიათ. "ბარსა" ერთადერთი კლუბია, რომლის მოთამაშემაც ეს ჯილდო ზედიზედ 2-ჯერ მოიგო - 2021 წელს პედრიმ და 2022 წელს გავიმ. უფრო ადრე, 2005 წელს "ოქროს ბიჭუნად" ლიონელ მესი დასახელდა. ეს ჯილდო 2019 წელს აქვს მოგებული ჟოაუ ფელიშს.