გოლის 12 ავტორი - საუკეთესო შედეგი ევროპაში

ესპანეთის ჩემპიონატის მიმდინარე გათამაშებაში ყველაზე მეტი, 21 გოლი "ბარსელონას" აქვს გატანილი. თუმცა ეს ერთადერთი მაჩვენებელი არაა, რაშიც კატალონიური კლუბი საუკეთესოა.

ლა ლიგის 9 ტურში გოლის გატანა "ბარსელონას" უკვე 12-მა ფეხბურთელმა მოახერხა. ეს საუკეთესო შედეგია არა მხოლოდ ესპანეთში, არამედ ევროპის ტოპ 5 ჩემპიონატში მოთამაშე 96 გუნდს შორის.

თავდამსხმელებიდან თავის გამოჩენა რობერტ ლევანდოვსკიმ, ფერან ტორესმა, რაფინიამ, ჟოაუ ფელიშმა და ლამინ იამალმა, ანუ ყველამ მოახერხა. გოლი გაიტანა ხუთმა ნახევარმცველმა: პედრიმ, გავიმ, ფრენკი დე იონგმა, ფერმინ ლოპესმა და სერჟი რობერტომ. მცველებიდან კი თავი ჟოაუ კანსელუმ და ჟიულ კუნდემ გამოიჩინეს.

ევროპის ტოპ 5 ჩემპიონატში მეორე საუკეთესო შედეგი ასევე კატალონიურ "ჟირონას" აქვს - გოლის 11 ავტორი. შემდეგ მოდიან "ბრაიტონი", "ნიუკასლი" და "მონაკო" 10-10 ფეხბურთელით.