ბრუნდება, მაგრამ რჩება? ბერნალის ბედი ბარსელონაში კითხვის ნიშნის ქვეშაა

"ბარსელონა" ბოლო კვირებში რამდენიმე ახალგაზრდა ფეხბურთელს დაემშვიდობა - ანსუ ფატის და პაბლო ტორეს წასვლის შემდეგ შესაძლოა მორიგი ტალანტიც დაემატოს ამ სიას.

მიმდინარე ზაფხულს, კატალონიურმა გრანდმა ორი ფეხბურთელი დაიმატა: ჟოან გარსია და მარკუს რაშფორდი, რომლის ტრანსფერიც ოფიციალურად ოთხშაბათს დადასტურდა, თუმცა კლუბში მარკ ბერნალის დაბრუნებაც ახალ შენაძენად აღიქმება - 18 წლის ნახევარმცველი თითქმის მთელი 2024-25 წლების სეზონი გამოტოვა ACL-ის მძიმე ტრავმის გამო, რომელიც გასულ აგვისტოში მიიღო.

მას შემდეგ ბერნალი ინტენსიურად მუშაობდა აღდგენაზე და უკვე სრულ მზადყოფნაშია. ის მონაწილეობს კლუბის წინასასეზონო ვარჯიშებში, თუმცა სეზონის პირველ მატჩში მისი მონაწილეობა შესაძლოა ნაადრევი იყოს.

"რომა" და "ბეტისი" ბერნალით ინტერესდებიან

თუმცა სრულიად გამორიცხული არაა, რომ ბერნალმა "ბარსელონას" მაისურით საერთოდ ვერ ითამაშოს. ჟურნალისტ ჯანლუკა დი მარციოს ინფორმაციით, იტალიური "რომა" დაინტერესებულია მისი გადაბირებით და უკვე დაამყარა კონტაქტი ლა ლიგის ჩემპიონთან ტრანსფერის თაობაზე.

ბერნალით ესპანური "ბეტისიც" არის დაინტერესებული, თუმცა ისინი კონკურენციაში უკანა პლანზე რჩებიან. იტალიური კლუბი აქტიურად ცდილობს მოლაპარაკებების დაჩქარებას, რადგან მარკ ბერნალს დიდ მომავალს უწინასწარმეტყველებენ, მიუხედავად მისი ბოლო ტრავმისა.

აღსანიშნავია, რომ ბერნალის შესაძლო გასხვისება "ბარსელონადან" სერიოზულ სიურპრიზად ითვლება - კლუბის შიგნით ყველა მაღალი შეფასებით საუბრობს მასზე, მათ შორის, მთავარი მწვრთნელი ჰანსი ფლიკიც. მისი საბოლოო წასვლა ნაკლებად მოსალოდნელია; თუნდაც იჯარით გაშვების შემთხვევაში, კლუბის გეგმაა, რომ ბერნალი მნიშვნელოვან როლს ითამაშებს 2025-26 წლების სეზონში.