ლამინ იამალი ისტორიულ ნიშნულზე - უკეთ ვიდრე მესი და რონალდუ

"ბარსელონას" ახალგაზრდა შემტევმა, ლამინ იამალმა კიდევ ერთ მნიშვნელოვან ნიშნულს გადააბიჯა. კატალონიელთა ვარსკვლავმა კარიერაში 50 გოლი დააგროვა, თანაც მხოლოდ 18 წლისა და 237 დღის ასაკში. 

ეს მაჩვენებელი იამალმა ბილბაოში, "სან მამესზე" გატანილი გამარჯვების გოლით დააფიქსირა, რომელმაც "ბარსელონას" "ბილბაოსთან" 1:0 მოაგებინა. სწორედ ამ ბრწყინვალე დარტყმამ მოუტანა გუნდს სამი ქულა და კიდევ ერთხელ აჩვენა, რამდენად გადამწყვეტი ფიგურაა ახალგაზრდა ფეხბურთელი ჰანსი ფლიკის გუნდში.

50 გოლი პროფესიონალურ კარიერაში

იამალს უკვე 50 გოლი აქვს პროფესიონალურ დონეზე:

• 44 გოლი "ბარსელონას" მაისურით
• 6 გოლი ესპანეთის ეროვნულ ნაკრებში

აღსანიშნავია, რომ ამ ნიშნულს მან უფრო ადრე მიაღწია, ვიდრე თანამედროვე ფეხბურთის ორმა ლეგენდამ – ლიონელ მესიმ (20 წელი და 315 დღე) და კრიშტიანუ რონალდუმ (21 წელი და 297 დღე). 

სეზონის საუკეთესო შედეგი

ბილბაოში გატანილი გოლი იამალისთვის კიდევ ერთი პირადი რეკორდიც აღმოჩნდა. მიმდინარე სეზონში ახალგაზრდა შემტევს უკვე 19 გოლი აქვს 36 მატჩში, რაც მის კარიერაში საუკეთესო შედეგია. წინა სეზონში მან 18 გოლი გაიტანა, ხოლო 2023/24 სეზონში – 7.

ამასთან, ბოლო პერიოდში იამალი შესანიშნავ ფორმაშია - 7 გოლი ბოლო 7 ლა ლიგის მატჩში.