ოფიციალურად: "ბარსელონას" ვალვერდე გაწვრთნის

რამდენიმე წამის წინ ოფიციალურად დადასტურდა, რომ მომდევნო სეზონიდან "ბარსელონას" მთავარი მწვრთნელი 53 წლის ესპანელი სპეციალისტი ერნესტო ვალვერდე იქნება. მისი პრეზენტაცია ხუთშაბათს, 1 ივნისს შედგება. ვალვერდე კატალონიურ კლუბთან 2-წლიან კონტრაქტს გააფორმებს.

ვალვერდესთვის "ბარსელონა" უცხო არაა. 1988-1990 წლებში, ის კატალონიურ კლუბში იმ დროს თამაშობდა, როდესაც გუნდს ლეგენდარული იოჰან კრუიფი წვრთნიდა. ვალვერდემ 29 თამაში ჩაატარა და 10 გოლი გაიტანა. "ბლაუგრანასთან" ერთად მან ესპანეთის თასი და თასების მფლობელთა თასი მოიგო.

ვალვერდეს სამწვრთნელო კარიერა 16 წელს ითვლის. 2001 წელს, ის "ბილბაოს" მთავარი მწვრთნელის ასისტენტად დაინიშნა. ერთი წლის შემდეგ, ის მთავარ მწვრთნელად დააწინაურეს. შემდეგ იყო "ესპანიოლი", "ოლიმპიაკოსი", "ვილიარეალი", ისევ "ოლიმპიაკოსი", "ვალენსია" და კვლავ "ბილბაო".

სამწვრთნელო კარიერაში ვალვერდეს მთავარი მიღწევა 2007 წელს, "ესპანიოლის" უეფას თასის ფინალში გაყვანაა. მას მოგებული აქვს საბერძნეთის ჩემპიონატი 3-ჯერ, ხოლო თასი - 2-ჯერ. 2015 წელს, მისმა "ბილბაომ", ესპანეთის სუპერ თასზე, "ბარსელონა", 2 მატჩის ჯამში, 5:1 გაანადგურა.