"ბარსელონას" მუზეუმიც დაიხურა

უკვე პანდემიად გამოცხადებულმა კორონავირუსმა გავლენა საზოგადოებრივი ცხოვრების ყველა დარგზე იქონია. გამონაკლისი არც ფეხბურთია.

კორონავირუსით გამოწვეულ შედეგებს უკვე იმკის "ბარსელონა". ოფიციალურად დადასტურებულია, "ბარსელონასა" და "ნაპოლის" შორის 18 მარტს გასამართი საჩემპიონთალიგო დაპირისპირება მაყურებლების გარეშე ჩაივლის, რაც კლუბს დაახლოებით 6 მილიონი ევროთი აზარალებს. განიხილება თამაშის გადადების ვარიანტიც. ასევე დადასტურებულია, რომ ლა ლიგის მომდევნო 2 ტური ასევე დახურულ კარს მიღმა გაიმართება. ხვალ გადაწყდება, ჩატარდება თუ არა ეს თამაშები დროულად.

მომდევნო  2 კვირის განმავლობაში არ ჩატარდება "ბარსა ბ"-ს, ახალგაზრდული გუნდების, ქალთა გუნდებისა და ფუტზალის გუნდის თამაშები. დროებით დაიხურა "ლა მასია".

ახლახანს კი ცნობილი გახდა, რომ ხვალიდან, 12 მარტიდან, 2 კვირით იკეტება "ბარსელონას" მუზეუმი და ყინულის დარბაზი.

დანამდვილებით შეიძლება ითქვას, რომ სხვა უამრავი კომპანიის მსგავსად, კორონავირუსით ფინანსურად "ბარსელონაც" მნიშვნელოვნად დაზარალდება.

"ბარსელონასთან" დაკავშირებული კორონავირუსის ყველა სიახლის ნახვა ამ ბმულზე შეგიძლიათ: http://barca.ge/corona