ვიქტორ ფონტი: ჩავი რიკი პუჩს უკვე ძირითად შემადგენლობაში ათამაშებდა

"ბარსელონას" პრეზიდენტობის კანდიდატმა, ვიქტორ ფონტმა თავისი წიგნის ("მომავლის "ბარსას" შექმნა) პრეზენტაციაზე ჟურნალისტებთან ისაუბრა.

"მიხარია, რომ ნაბიჯი წინ გადავდგი და წიგნი წარმოგიდგინეთ. აქ ჩვენი პროექტის პრეზენტაციაა.

ბართომეუს მხრიდან ვალვერდეს მხარდაჭერამ დატოვა შთაბეჭდილება, რომ ეს გადაწყვეტილება ინერციითაა მიღებული. ჩვენ გვყავს მესი, გვყავს ყველაფრის მომგები თაობა, რომელიც იგებს დუბლს, მაგრამ ჩავარდნა აქვს ჩემპიონთა ლიგაზე. თუმცა, დამალული პრობლემები არსებობს.

ლეგიტიმიურია იმაზე ფიქრი, რომ თამაშის სხვა სტილებიც კარგია, მაგრამ თუ ასე ფიქრობ, უნდა თქვა კიდეც. ამის უთქმელობა ისეთივე შეუთავსებლობაა, როგორც პეპ სეგურას დირექტორობა. ეს "ბარსელონას" სტილის იდეას ეწინააღმდეგება.

სამომავლოდ, ორგანიზაციულ სტრუქტურაზე ვმუშაობთ. გვინდა, ჩვენს დირექტორთა საბჭოში ნიჭიერი და მართვის გამოცდილების მქონე ხალხი იყოს.

მიგვაჩნია, რომ სპორტის სხვადასხვა სახეობების განვითარება უნდა გაძლიერდეს.

ერნესტო ვალვერდესთან კონტრაქტს არასდროს გავაფორმებდი. ბოლო დროს "ბარსელონას" თამაშის ყურებით ვიწყენ ხოლმე.

ვმუშაობთ იმისათვის, რომ კრუიფის იდეა 100%-ით განვახორციელოთ. ამისთვის საჭიროა, რომ პროფესიონალი და საკუთარი საქმის მცოდნე ხალხი გვყავდეს დაწყებული ვიცე-პრეზიდენტით და დამთავრებული მწვრთნელით. კრუიფის იდეებზე დაფუძნებული აკადემია კლუბს გამოადგება.

ჩავისთან ერთად მუშაობას განვაგრძობთ იმის გადასაწყვეტად, თუ რა როლი უნდა დაიკავოს მან კლუბში. ის "ბარსელონას" მწვრთნელი გახდება იმის მიუხედავად, ვინ იქნება პრეზიდენტი. ის კლუბს მხოლოდ 3-4 წლით არ გაწვრთნის - ის "ბარსელონას" მომავლისთვის ზრუნვას განაგრძობს.

ჩავიმ მითხრა, რომ თუ ის "ბარსელონას" მწვრთნელი იქნებოდა, რიკი პუჩი უკვე სასტარტო შემადგენლობაში ითამაშებდა.

ეჭვგარეშეა, რომ დე ლიხტის შესაძენად ყველაფერი უნდა გავაკეთოთ. ის ბაზარზე არსებული ერთ-ერთი უნიკალური ტალანტია. იმედი მაქვს, კლუბი მას დაიმატებს.

თუ დე ლიხტი ჩვენთან არ გადმოვა, ეს სპორტული მიმართულების წარუმატებლობა იქნება. არა მგონია, საქმე ფულში იყოს. საქმე სპორტულ პროექტს ეხება. თუმცა, იმედი ვიქონიოთ, რომ ყველაფერი კარგად დასრულდება.

ნეიმარსა და გრიზმანს არ დავიმატებდი. ბრაზილიელს მოედანს მიღმა მისი ქცევის გამო, ხოლო ფრანგს მისი პოზიციის გამო, რომელიც "ბარსელონაში" უკვე დაკავებულია და ასევე იმის გამო, რომ გასულ წელს მან ჩვენთან თამაშზე უარი თქვა. სხვა ვარიანტებიც არსებობს.

ვღელავ იმაზე, რომ "ბარსელონა" მოკლევადიანი პერსპექტივების კლუბად იქცა. ერთი თვის წინ გულშემატკივრების 90% კმაყოფილი იყო, ახლა კი, იმის გამო, რომ "ენფილდზე" წარუმატებლად ვითამაშეთ, გამოდის, რომ ყვეალფერი უნდა შეიცვალოს.

მესი კიდევ რამდენიმე წელი ითამაშებს. თუმცა, რეალისტები უნდა ვიყოთ და გავაცნობიეროთ, რომ 10-წლიან მონაკვეთში იმ სტილს უნდა დავუბრუნდეთ, რომელმაც კლუბს ამხელა წარმატება მოუტანა.

პრეზიდენტის უნდობლობის საკითხის დაყენებას არ ვაპირებთ. 2021 წლის საპრეზიდენტო არჩევნებს დაველოდებით. თუმცა, თუ მანამდე რამე მოხდა, ამისთვის მზად ვიქნებით."