FIFA-ს წესი, რომელიც "ბარსას" ნეიმარის 170 მილიონ ევროდ ყიდვის უფლებას აძლევს

მომდევნო ზაფხულში, უფრო კონკრეტულად კი 2020 წლის 3 აგვისტოს შემდეგ, "ბარსელონას" უფლება ექნება ნეიმარი "პარი სენ-ჟერმენიდან" დაახლოებით 170 მილიონ ევროდ გამოისყიდოს.

არსებობს FIFA-ს დოკუმენტი სახელწოდებით "რეგულაციები ფეხბურთელების სტატუსისა და ტრანსფერების შესახებ." ამ მუხლის მე-17 თავი კონტრაქტის საპატიო მიზეზის გარეშე გაწყვეტის შესაძლებლობას იძლევა, თუ გასულია "დაცული პერიოდი". იმავე დოკუმენტის მიხედვით, დაცული პერიოდი არის ფეხბურთელსა და კლუბს შორის მოქმედი კონტრაქტის გაფორმებიდან პირველი 3 წელი. ნეიმარის შემთხვევაში, ეს ვადა 2020 წლის 3 აგვისტოს გადის.

იმავე დოკუმენტში საუბარია კომპენსაციის გადახდის ვალდებულებაზეც. ფეხბურთელი, კონტრაქტის გაწყვეტის შემთხვევაში, ვალდებულია კლუბს კომპენსაცია გადაუხადოს. კომპენსაციის ოდენობა ბევრ ფაქტორზეა დამოკიდებული, მათ შორის კლუბის მიერ ფეხბურთელში გადახდილ თანხაზეც.

Mundo Deportivo-ს ინფორმაციით, ნეიმარის ადვოკატებმა FIFA-ს წარმომადგენლეთან კონსულტაცია გაიარეს და დაადგინეს, რომ ერთი წლის შემდეგ ბრაზილიელს საკუთარი თავის "პარი სენ-ჟერმენიდან" გამოსყიდვა დაახლოებით 170 მილიონ ევროდ შეეძლება.