დანი ოლმო: "ბარსელონაში" ახლავე დაბრუნება მინდა

ზაგრების "დინამოს" ლიდერი დანი ოლმო, რომელიც "ბარსელონას" სკოლის აღზრდილია, კატალონიური კლუბის მხრიდან დაინტერესებით მოხარულია.

ცოტა ხნის წინ გავრცელდა ინფორმაცია, რომ "ბარსელონამ" ზაგრების "დინამოს" ოფიციალური წინადადებით მიმართა. როგორც ოლმოს კომენტარიდან ერკვევა, ეს ცნობა სიმართლეს შეესაბამება.

"მიხარია, რომ ჭორები კონკრეტულ შემოთავაზებაში გადაიზარდა და "ბარსელონა" ჩემს დაბრუნებაზე დაფიქრდა. "ლა მასიაში" 6 წელი გავატარე და იქ შეძენილი ღირებულებები მთელი ცხოვრების განმავლობაში გამომყვა.

გუნდის იანვარში გამოცვლა? არ ვიცი. პასუხისმგებლობები მაქვს. თუმცა, თუ კლუბები მოილაპარაკებენ, ვფიქრობ, ყველასთვის აჯობებს, თუ ზაგრებს ახლავე დავტოვებ.

"დინამო" კარგ ტრანსფერს განახორციელებს, მე კი მსოფლიოს ერთ-ერთ უდიდეს კლუბში ვითამაშებ. ყველაზე დიდი მოტივაცია, რაც შეიძლება არსებობდეს, ლიონელ მესისთან ერთად ვარჯიში და მისგან სწავლაა.

კონკურენცია? ჩემი კარიერა ადვილი არასდროს ყოფილა. მირჩევნია გუნდი იანვარში გამოვიცვალო, ვიდრე ზაფხულში. ეს ევროპის 2020 წლის ჩემპიონატზე ჩემი მოხვედრის შანსებს გაზრდის." - ციტირებს დანი ოლმოს სიტყვებს L'Esportiu.

გავრცელებული ინფორმაციით, ზაგრების "დინამო" 21 წლის შემტევს 40 მილიონ ევროდ აფასებს.

დანი ოლმო "ბარსელონას" აკადემიაში 2007-2014 წლებში ირიცხებოდა, რის შემდეგაც ის ხორვატულ კლუბში გადავიდა. მიმდინარე სეზონში, ზაგრებელთა მაისურით ჩატარებულ 22 თამაშში მან თავი 8 გოლითა და 6 შედეგიანი გადაცემით გამოიჩინა. აქედან 3 გოლი და 2 ასისტი ჩემპიონთა ლიგის საკვალიფიკაციო ეტაპზე, ხოლო 2 გოლი და 1 ასისტი ფინალურ ეტაპზე მოდის.