მესი ყველაზე ძვირადღირებული საკუთარ პოზიციაზეც აღარაა

ასაკის მატებასთან ერთად, მსოფლიოს საუკეთესო ფეხბურთელს, ლიონელ მესის, სატრანსფერო ღირებულება აკლდება, რაც ლოგიკურია.

დიდი ხნის განმავლობაში მსოფლიოში ყველაზე ძვირადღირებული ფეხბურთელის წოდების ტარების შემდეგ, მესიმ ეს სტატუსი დაკარგა, ახლა კი, ლეო ყველაზე ძვირადღირებული აღარც თავის პოზიციაზეა.

Transfermarkt-ის ინფორმაციით, 32 წლის მარჯვენა შემტევის სატრანსფერო ღირებულება 140 მილიონი ევროა. ეს, მარჯვენა შემტევებს შორის, მე-2 შედეგია. ამ პოზიციაზე ყველაზე ძვირადღირებული 27 წლის მოჰამედ სალაჰია 150 მილიონით.

სავარაუდოდ, მესი, მალე, მე-2 პოზიციასაც დაკარგავს, რადგან "დორტმუნდის" 19 წლის ამომავალი ვარსკვლავის, ჯეიდონ სანჩოს სატრანსფერო ფასი უკვე 120 მილიონი ევროა.

თუ ყველა პოზიციას გავითვალისწინებთ, მესი მე-8 პოზიციაზეა. მას მბაპე, სტერლინგი, ნეიმარი, მანე, სალაჰი, კეინი და დე ბრუინი უსწრებენ. ლეო 30 წელს გადაცილებული ერთადერთი ფეხბურთელია, რომელიც ყველაზე ძვირადღირებული მოთამაშეების 30-ეულში მოხვდა.