გამოსამშვიდობებელი წერილი წასულებს
წასულები ცუდად ჟღერს, ჯვარი გწერიათ, მაგრამ, წახვედით გუნდიდან და უკვე წასულები ხართ. ერთი თქვენთაგანი სანამ გუნდიდან წავიდოდა, ხელიდან წავიდა, რაღაც თბილი სიტყვებიც მოგვაძახა, ამდენი რამ მომეცით, გზა გამიხსენით და ფეხბურთელად მაქციეთო, ბოლომდე არც წამიკითხავს მისი მადლობა, ჯობდა ის დაეწერა "ბარსას" როგორ გადაუხადა სამაგიერო, ფინანსურ კრიზისში მყოფ კლუბს, რომელსაც წვალებით მოუწევს თავის გატანა, თავისივე აღზრდილებისა და ხელფასდაკლებულების ხარჯზე, ჯერჯერობით ძირს გდია და ილაიშ მორიბამ წიხლი დააყოლა.
მადლობა ილაიშ! ნამდვილი კულე ხარ!
პოგბას გადარებენ, მაგრამ მგონია, რომ მომო სისოკოც არ დადგება შენგან, ფეხბურთელს, რომ პრიორიტეტები აერევა, მერე ძალიან რთულია რაიმე დაულაგდეს, ახლა, რომ იმას ვერ განსაზღრავ, ამ ასაკში, კარგი ხელფასი ჯობია თუ „ბარსასთან“ ერთად ზრდის გაგრძელება, ესე იგი, პრობლემები გაქვს, შესაძლოა, ძირითადში მოხვედრის თავიც არ გქონდა და.. არც ამ შემთხვევაში გიღიმის მომავალი, აბა, სად გაგონილა ფეხბურთელი ბრძოლის გარეშე გარბოდეს და სხვაგან გამოსდიოდეს თავის დამკვიდრება?! ან ყველგან შეძლებ საკუთარი სიტყვის თქმას, ან ყველა პრობლემის წინაშე გაიქცევი, ხოდა, გაიქეცი ფორესტ! გაიქეცი!
ახლა რაც არ უნდა გააკეთო, თუნდაც რაღაც საოცარი გოლი გაიტანო, ან, ძალიან მაგარი პასი გამოძერწო, (მომო სისოკოს სტილში), მაინც იმ გორელი ფანის შთამბეჭდავი ქებათა-ქება გამახსენდება, - საღოლ....
ოჯახში ერთი პრობლემატური ბავშვი ყველგან გამოერევაო, ამბობენ და, ამ ოქროს თაობაში შენ გამოდექი ეს ჭირიანი.
ნახვამდის ილაიშ, შე უმადურო ბავშვო!
წესით და რიგით, სათითაოდ უნდა ვწერდე გამოსამშვიდობებელ წერილებს, გრიზმანისთვის მაინც, მაგრამ მეც წამომიარა უმადურობის სტიქიამ და ერთად მოვუყარე თავი, ნაკლებად და მეტად დასაფასებლებს. ორი სიტყვა მოდი ემერსონზეც ვთქვათ, ბრაზილიელი „ტოტენჰემის“ ფეხბურთელი გახდა.
ემერსონ, ჯიგარო.. ან მოსვლა რა იყო, ან წასვლა?
ვიცით, რომ თავად არაფერი გადაგიწყვიტავს, იმ თინეიჯერის როლში აღმოჩნდი უფროსები რო უწყვეტენ სად გააგრძელოს სწავლა. რაღაც მხრივ გულდასაწყვეტია, არ დაგიმალავ და ნოკიას ტელეფონსაც მახსენებ, ლაპორტა კი ქუჩის ბიჭის როლში აღმოჩნდა, წაართვა შენი თავი „ბეტისს“ და ეგრევე დაგალომბარდა. რას ვიზამთ?! ფულია საჭირო, შენისთანა ათს დავალომბარდებდით საშუალება რომ იყოს, ალბათ ამიტომ ითამაშე ბოლო მატჩი ასე უხასიათომ, „ბარსაში“ თამაშზე რომ ოცნებობ და გალომბარდებენ, ვერ არის კარგი ამბავი. არ ვარ მადლიერების განწყობაზე, მაგრამ რომც ვიყო, მადლობა მხოლოდ იმისთვის გეკუთვნის, რომ რამდენიმე მილიონი წაგვახმარე, ეგეც საქმეა, ჩემზე, რომ ყოფილიყო სულ სხვა ხალხს გავუშვებდი, მაგრამ იმათი გაშვება რთულია, წიხლით აგდებენ და არ მიდიან, შენ კიდე მარტივად წახვედი, პრობლემების გარეშე, აი, გამოჩნდა ერთი კარგი სამადლობელი მიზეზი, ხოდა, მადლობა ემერსონ, ასე, ლამაზად და უპრობლემოდ, რომ წახვედი!
აი, მივადექით ანტუანსაც, ახლა ალბათ ფრანციშკუ ტრინკაუ ზის სადღაც ინგლისში და დედას იგინება, აბა რას წარმოიდგენდა, რომ „ბარსას“ მარჯვენა ფლანგზე მხოლოდ ერთი ვარიანტი დარჩებოდა, დემირის სახით, ჯერ ლეო წავიდა, მერე გრიზმანი, დემბელე ტრადიციულად დარეტიანებულია, სხვა რა უნდა ინატროს დამწყებმა მარჯვენა გარემარბმა?! მაგრამ, სანამ ეს ხალხი წავიდოდა, თავად ტრინკაუ წავიდა, არ გაგიმართლა ფრანციშკუ, გააგრძელე „ვულვზში“ წვალება.
კუმანს ნამდვილად არ გაახარებდა ეს ამბავი, დემირის იმედზე მტერი იყოს, ან ტაქტიკის შეცვლა მოუწევს, ან ჩვენ მოგვიწევს დემირის ყურება. თუმცა, ამაზე მოგვიანებით, ახლა გრიზმანი გვყავს გასაცილებელი.
ანტუან, არასდროს მინდოდა შენი „ბარსაში“ გადმოსვლა, - რაღაც ვერ დავიწყე კარგად, ასეთი უმადურობაც არ ვარგა, მაგრამ, მთავარია, რომ გულახდილი იყოს, სხვაგვარად უფრო შეურაცხმყოფელი იქნება.
არ მინდოდა, რადგან ვერ ვხედავდი შენს ადგილს ამ გუნდში და მართალი გამოვდექი, ორწლიან წვალებას გვაყურებინე, იშვიათი გამონათებებით, შენგან გოლებს ელოდნენ, (მე არ ველოდი) შენ კი ფეხებში ვარდნით დაამახსოვრე ქომაგს თავი, შეტევა თუ არ გამომდის, დაცვაში მაინც ვიზამ რამესო, ვერც ტაქტიკურად მოერგე გუნდს, ვერც სტილით, კარგია, რომ იქ დაბრუნდი, სადაც შენი ადგილია, სუარესთან დუეტში კარგი სანახავი იქნები, შენს ნაცვლად, რომ ფელიში მიგვეღო ერთობ კმაყოფილი შევიქნებოდი, მაგრამ.. დე იონგი კაცო?! ეს მეტისმეტია! თანაც, ყველაზე ცუდი დე იონგი ფეხბურთელ დე იონგებს შორის?! თითქოს ახლა ორი დე იონგი უნდა გვყავდეს, მაგრამ დააკვირდები და ორი ბრეითუეიტი გვყავს. ვფიცავ! ორივეს ათი თავით მირჩევნიხარ, მაგრამ ისიც სათქმელია, რომ მათზე ათჯერ მეტი ხელფასი გაქვს, „ბარსაში“ კი დიდი დეპრესიის ეპოქა იწყება. კიარადა, დაიწყო. ისევ შენ გვერჩივნე ანტუან, მაგრამ რას ვიზამთ?!
ნაადრევად დაწერილ პროგნოზებში ისიც ვახსენე, რომ სეზონის ბოლოს, ან გრიზმანი იქნება ჩემი იმედგაცრუება, ან აგუერო-მეთქი, აი, ამას ჰქვია, რომ გამასწარი! კარგი იქნებოდა გოლით წასულიყავი და არა ისეთი ჩაკარგული და უსახური მატჩით, მაგრამ, მთელი „ბარსელონური“ კარიერა ეგეთი გამოგივიდა.
მიუხედავად ამისა, მაგარი გოლებიც მახსოვს, საუკეთესო ათი რომ შევკრიბო, (შევკრებ აუცილებლად ვიდეოს სახით), ათივე ერთმანეთზე უკეთესი გამოვა, უბრალოდ, ცოტა იყო, ეგ არის პრობლემა.
ფაქტია, რომ ტრანსფერი ჩავარდა, როგორც ფინანსურად, ისე სათამაშო თვალსაზრისით, ფინანსები ისედაც აღწერს სათამაშო მხარეს, ხოდა, 120 მილიონად ნაყიდ ფეხბურთელში, 40 მილიონზე მეტს არავინ იხდის, ამდენით დაიკლო გრიზმანის ფასმა, 80 მილიონად ფასდება შენს მიმართ იმედგაცრუება! 80 მილიონიანი იმედგაცრუება კიდე საშინელი იმედგაცრუებაა.
ბევრ გოლს ვერ გისურვებ, კონკურენტი ხარ, ეჭვი არ მეპარება, რომ იქ უფრო კარგად ითამაშებ, სადაც შენი ადგილია, მაგრამ, იმაზე თავს ვერ დავდებ, რომ სუარესს გაახარებს შენი დანახვა. ალბათ მესის უკვე გაუგზავნა ემოჯის სმაილი, რომელიც სიმწრისგან სახეს იკაწრავს.
ბევრ გოლს გისურვებ, ეროვნულ ნაკრებში!
მორიბასგან განსხვავებით, მადლობა ანტუან!
პ.ს: გუნდი დატოვა მანაიმ, - კარგად მანაი!
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 14 ]