მატჩისშემდგომი მიმოხილვა: გველი გაგვიზრდია უბეში!

მშვენიერი მატჩი იყო. მეგონა თამაში 35-ე სკოლაში გაიმართებოდა, "ბარსა" მესამე შემადგენლობით გავიდოდა მოედანზე და მოსაწყენი ამბავი გვექნებოდა. სულ სხვაგვარად მოხდა ყველაფერი. გადასარევი მოედანი იყო, უამრავი მაყურებელი და დიდი ფეხბურთი! 

ხდება ხოლმე ასე თასის თამაშებზე. არც პირველი ყოფილა და არც ბოლო. როცა მესამელიგელ გუნდს ხვდები ამ გუნდისთვის ეს სეზონის მატჩია და სუპერმოტივირებული გამოდის მოედანზე. გრანდი კი ცდილობს ცალი ფეხით მოიგოს. ასე მივიღეთ ის, რაც მივიღეთ. 

თქვენი არ ვიცი, მე 2002/03 წლების მატჩი გამახსენდა, ვან გაალის "ბარსა" ნოველდაში ჩავიდა. ვერ ვიტყვი, რომ ძირითადი შემადგენლობა გაიყვანა, მაგრამ ჰყავდა ვარსკვლავები, მაგალითად რიკელმე, დე ბური, ჩავი და ა.შ. "ბარსამ" პირველი ტაიმი 1:0 მოიგო და ზუსტად ასე ცალი ფეხით ცდილობდა გასვლას, მაგრამ საბოლოო ჯამში 3:2 დამარცხდა. 

გამახსენდა ეს მატჩი იმიტომ, რომ მაშინ ჰეთთრიქი შეასრულა ტონი მადრიგალმა. გადაიყვანა ჭკუიდან სტადიონზე შეკრებილი სამიათას ოთხი ადამიანი. ეს მადრიგალის კარიერის მატჩი იყო. ჰოდა, მგონია, რომ სოლდევილიასთვისაც კარიერის მატჩი იქნება. ყველაფერი წინ აქვს, ჯერ 21 წლის არის, მაგრამ ამაზე მაგარ შედეგს ალბათ ვეღარ დადებს. მეორე დღეს ყველა გუგლავს და კითხულობს საიდან მოვიდა ეს კაცი. მერე იგებენ, რომ თურმე არ არის უბრალო ბიჭი, ესპანეთის ასაკობრივ ნაკრებებში უთამაშია, ესე იგი, თავის დროზე რჩეულებში მოხვდა, "ბარსას" აკადემიაში ყოფილა, ესე იგი, პასის კულტურა და ტექნიკა თავისთავად ექნება. მერე კი ინგლისში წასულა სამოგზაუროდ და აი, იქ აირია ყველაფერი. აბა, ბირმინგემში რო მიდიხარ რა გგონია. ემილ ჰესკი ჯერ კიდევ დიდი ფეხბურთელი ჰგონიათ, ფეხბურთზე ცოტა განსხვავებული შეხედულებები აქვთ. მოკლედ, სოვდევილიაც ათრია ბირმინგემის ქარმა ორი წელი და ახლა ამ ბრწყინვალე გუნდში გადმოსულა, შეხედა ინტერსიტის და სიტყვა მისცა საკუთარ თავს, სადაც კი ცნობილ გუნდს შევხვდებით იქვე ბურთს გადავახევ თავზე და აქედან აუცილებლად წავალო. 

წავა ალბათ, სამი გოლის მერე უეჭველად წავა. 

კარგი ამბებიც გვაქვს, ეგრე კი არ არის.. 

პირველი კარგი ამბავი ის არის, რომ "ბარსამ" დამატებით დროში მოიგო და შემდეგ ეტაპზე გავიდა. ასეა თუ ისე, მაინც კარგია. 

მეორე კარგი ამბავი ის არის, რომ რონალდ არაუხო დაბრუნდა, გოლი გაიტანა, კარის ხაზიდან გამოაძრო ბურთი და გაგვახარა. სოვდევილია იქით იყოს, ეგ რონალდს არ ეკარებოდა, ცალკე იდგა ხოლმე.

შანსი მიიღეს ფეხბურთელებმა, მაგრამ ვერ ვიტყვი, რომ გამოიყენეს. მაგალითად, ბელერინმა, პაბლო ტორემ, დეპაიმ.. არ ჰგავდნენ იმ ფეხბურთელებს, რომელთაც ძირითადში უნდათ მოხვედრა. ყველაზე მეტად ამათგან პაბლო ტორე მომეწონა, ვერც იმას ვიტყვი, რომ ჯოჯოხეთურ კონკურენციაში უწევს გზის გაკვალვა, კი, გასაგებია, პედრი-გავი, დე იონგი, მაგრამ სათამაშო დროის მიღება მაინც შეუძლია. 

აი, კესიე დიდად არ მომეწონა და კიდევ ერთი თავშიშემოსარტყმელი ტრანსფერის შთაბეჭდილებას ტოვებს. 

სამი გოლი გაუშვა ჩვენმა მეკარე პენიამ. შეეძლო რომელიმეს აღება? რა თქმა უნდა, რომელიმეს კი არა, ყველას მოგერიება შეეძლო. 

სხვათა შორის, კარგად შემოვიდა ფატი და არაუშავდა რაფინიას, კარგი მატჩი ჰქონდა დემბელესაც, თუმცა, ეს ისეთი თამაშია, სადაც რაც არ უნდა გააკეთო დიდად არავინ შეგაქებს, წარუმატებლობის შემთხვევაში კი გადაგივლიან. არ არის ინტერსიტი არაფრის საზომი. მხოლოდ მოტივაციას თუ გამოავლენს და აღმოჩნდა, რომ მოტივაციის დიდი ნაკლებობაა. მიუხედავად იმისა, რომ თითქოს კონკურენციაა კლუბში. 

ანგარიში არაუხომ გახსნა ძალიან კარგი თავური დარტყმით. ჯერ ხურდება, კიდევ გაიტანს. 

მერე იმ კაცმა გაგვითანაბრა. ჩვენივე გაზრდილმა. "ბარსას" ძირითადში მოხვედრაზე რომ ოცნებობდა. 

დემბელემ ისევ წინ გაგვიყვანა, ლამაზი გოლი იყო, თავის სტილში შეაგდო. როგორც წესი, ასეთი დარტყმის მერე სტადიონს აცილებს ხოლმე, მაგრამ ამჯერად ყველაფერი გამოუვიდა. 

ისევ სოლდევილიამ გაგვითანაბრა. აქ უკვე გუგლავდა ხალხი. 

მესამედ რაფინიამ გაგვიყვანა წინ. კარგი პასის შემდეგ კუთხე დაკეტა და გაიტანა. ესეც წერტილი. მორჩა ამათი ამბავიო იფიქრა ყველამ, მაგრამ სოლდევილიამ ისევ გაათანაბრა და ყველამ მისი აგენტის ძებნა დაიწყო, აგენტი კიდე ამ დროს ბარში იყო და სვამდა. დეპრესიაში ყოფილა, იქნებ ეშველოს რამეს. 

ასე გადავედით დამატებით დროში და კარგი ფეხბურთიც გაგრძელდა. ცოტა ვარჯიშს ჰგავდა, მაგრამ მცირე დაძაბულობა მაინც იგრძნობოდა. ჰქონდა შანსები ანსუ ფატის და ერთ-ერთი გაიტანა კიდეც. ესეც ასე, "ბარსა" შემდეგ ეტაპზეა. 

სულ რაღაც სამ დღეში დიდი ჯახია "ატლეტიკოსთან". "ინტერსიტის" მერე "ატლეტიკოსთან", თანაც გასვლაზე თამაში არავის უხარია, მაგრამ იმედი ვიქონიოთ, რომ სულ სხვა გუნდს ვიხილავთ. ახლა რომ ვთქვა პედრიმ და ლევანდოვსკიმ დაისვენეს-მეთქი, ეგეც სასაცილო იქნება, მიუხედავად იმისა, რომ ორივემ ითამაშა მუნდიალზე, დასასვენებელი დრო საკმარისად ჰქონდათ. რაღა დროს დასვენებაა... ახლა იწყება ყველაფერი.