მატჩისშემდგომი მიმოხილვა: პედრის მაგია და უფრო ახლოს ჩემპიონობასთან
დავალება შესრულებულია, ურთულეს მატჩებამდე "ბარსამ" ორივე შეხვედრა მოიგო - "სელტასთან" და "მალიორკასთან", ორივე რთულად, ორივე მინიმალური ანგარიშით. დანაკარგიც დიდია, რობერტ ლევანდოვსკი სეზონის ყველაზე მნიშვნელოვან კვირას გამოტოვებს. ჩემპიონობამდე სულ მცირეა დარჩენილი, უკვე სამივე ტურნირზე ასეთი სურათია, ლა ლიგაშიც, კოპაზეც და ჩემპიონთა ლიგაზეც. ტრავმებს თუ არ ჩავთვლით "ბარსა" კარგ ფორმაში ხვდება საფინალო ნაწილს.
უკვე დაგვეტყო
გუნდი ბევრს უტევს - გოლი არ გადის. ამ დროს ბუნებრივია ცენტრფორვარდზე გეფიქრება და ჰყავს "ბარსას" კარგი ფორვარდი, ოღონდ განაცხადს მიღმა. ფერანმა კი გოლი ვერ შეაგდო, არადა, სწორედ ახლა იყო საჭირო თვითრწმენა, მომდევნო მატჩებში მთავარი სიტყვა უნდა თქვას, არასდროს მისი კარიერის განმავლობაში ამხელა წონა მის ყოფნა/არყოფნას არ ჰქონია. ფერანი და ოლმო - ამ დუეტს მოუწევს ლევანდოვსკის ფუნქციების შეთავსება, ამ დუეტს მოუწევს მთავარი დარტყმის მიტანა "მადრიდისა" და "ინტერის" კართან. რა გამოვა ვნახავთ, "მალიორკასთან" ერთს გამოუვიდა, მეორეს არა.
თუმცა, მხოლოდ ფერანში არ არის საქმე, მთელი გუნდი უტევდა, ბევრს ურტყამდნენ კარისკენ და კარშიც, მაგრამ პირველ ტაიმში გოლი საერთოდ არ გავიდა, ხარისხი კი დამაკმაყოფილებელი იყო, პედრი და ლამინე აგრძელებენ არანორმალური ფეხბურთის ჩვენებას. ტექნიკური, კრეატიული და კიდევ რაღაც, მხოლოდ ამ ორს რომ ახასიათებს. ჯერჯერობით სახელსაც რომ ვერ დაარქმევ. კარგიც უნდა ითქვას ამ გადამწყვეტი კვირის წინ და კარგი ეგ არის - პედრი კარიერის საუკეთესო ფორმაშია.
ფლიკმა დრო მისცა ფატის, ფორვარდია საჭირო და ვინ იცის, იქნებ დასჭირდეს კიდეც, მატჩის მერე შეაქო, მაგრამ მე შესაქები ვერაფერი დავინახე, მისი იმედი მოახლოებულ მატჩებში ნამდვილად არ მექნებოდა.
სწრაფი გოლი
მეორე ტაიმი იგივე სცენარით დაიწყო, ამჯერად დასაწყისშივე გაუმართლა "ბარსას", დანი ოლმომ შეძლო გოლის შეგდება, კარგი გოლი იყო, მას რომ სჩვევია ისეთი, ფლანგიდან გაკეთებული პასი საჯარიმოში სახით კარისკენ მიიღო და მარცხენა ფეხით შორეულ კუთხეში შეაგდო. ამდენ დროს თუ მისცემ გაიტანს აბა რას იზამს?! მიუხედავად იმისა, რომ სხვა ფეხბურთელებს უფრო მეტი გოლი აქვთ, მგონია რომ ლევანდოვსკის მერე ყველაზე გამტანი ფეხბურთელი სწორედ დანი ოლმოა, ყველაზე მეტი პოზიციიდან, თან ორივე ფეხით შეუძლია შეგდება. აი, ამ კაცის იმედი ნამდვილად მაქვს.
გოლის მერე ორი კარგი მომენტი კიდევ შეიქმნა, ფატიმ შორიდან კარგად დაარტყა კარში, მაგრამ მეკარემ აჯობა, აქაც არა იმდენად დარტყმამ, რამდენადაც პირველმა ორმა შეხებამ მიიქცია ყურადღება, ისეთი შეხება აქვს ბურთთან რომ თითქოს ისევ ჯიუტად მაინც ჩანს ეს მინავლული პოტენციალი, ალბათ რაღაც ჯადოქრობაა საჭირო ამის გამოსაღვიძებლად, ფლიკი კიდევ ვერ აღმოჩნდა ჯადოქარი. მერე კიდევ პედრიმ მორიგი სასწაული პასი გააკეთა და შეატოვა იამალი მეკარეს პირისპირ. ლამინემ კიდევ ვერ გაიტანა. ნეიმარი გამახსენდა "ბაიერნთან", იგივე მოძრაობა, და ფეხებს შორის ნოიერს! ვაჰ, როგორ ჰგავდა, ლამინემაც ასე სცადა, მაგრამ ვერ გააძვრინა ბურთი მეკარის დატოვებულ სივრცეში. ასე გაიფლანგა 100%-იანი შანსი და რაიმე მსგავსი რომ მომდევნო ოთხ შეხვედრაში მოხდეს ალბათ გულიც ვერ გაუძლებს.
წინ რა გველის
ნერვიულობა, აღელვება, მე მგონი, რომ სიხარულიც.
მაშ ასე, ვიწყებთ ფინალით, სამ დღეში! მზადყოფნა იყოს!
ვაგრძელებთ ჩემპიონთა ლიგაში "ინტერთან" ჯერ სახლში, მერე გასვლაზე.
ვამთავრებთ ლა ლიგაში კლასიკოთი, სადაც გადაწყდება კიდეც ჩემპიონის ბედი.
აბა შენ იცი ჰანსი!
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 11 ]