ბუსკეტსი: "ატლეტიკო" "რეალზე" ძლიერია"

"ბარსელონას" საყრდენმა ნახევარმცველმა, სერხიო ბუსკეტსმა კატალონიურ გამოცემა Sport-ს ინტერვიუ მისცა და რამდენიმე საინტერესო საკითხზე ისაუბა. ამ ინტერვიუს სრულად გთავაზობთ.

- მოედანზე, ბუსკეტსი ყოველთვის ერთ-ერთი მნიშვნელოვანი ფეხბურთელია, მაგრამ რა როლი გაკისრიათ გასახდელში?

- წლებმა დიდი გამოცდილება შემძინა. ვეტერანი ფეხბურთელებისგან ვისწავლე, თუ როგორ უნდა მოვიქცე კონკრეტულ სიტუაციაში. ეს ეხება გასახდელში თანაარსებობასაც.

- ახლა, თქვენ ერთ-ერთი კაპიტიანი ხართ. თავს გუნდის უფრო მნიშვნელოვან წევრად თვლით?

- ყოველთვის ვგრძნობდი, რომ საკმაოდ მნიშვნელოვანი ვიყავი. რა თქმა უნდა, ეს ის როლი არაა, რომელიც პირველ გუნდში დაწინაურების დროს მქონდა. ახლა, გუნდის მე-3 კაპიტანი ვარ. რა თქმა უნდა, ამას ცვლილებები მოჰყვა.

- არავინ დავობს, რომ დღითი დღე უკეთესი ფეხბურთელი ხდებით. რა არის თქვენი საიდუმლო?

- ძალიან თვითკრიტიკული ვარ. შესაძლოა, ზედმეტადაც კი. ყოველთვის ვაკვირდები, როგორ მიმდინარეობდა თამაში, რა გავაკეთე კარგად, რა არცთუ კარგად, რა უნდა გამოვასწორო... დღითი დღე ბევრი რამ იცვლება. შენ სოციალურ ცხოვრებაში, საკუთარ თავს ისე უნდა მოუარო, როგორც შეძლებ: კარგად დაისვენოო, ივარჯიშო უმაღლეს დონეზე, ისწავლო თანაგუნდელებისგან და მწვრთნელისგან. იმედი მაქვს, განვითარებას განვაგრძობ და "ბარსელონას" ერთ-ერთი ლიდერი ყოველთვის ვიქნები.

- რა მომენტი მიხვდი, რომ შეგეძლო პროფესიონალი ფეხბურთელი გამხდარიყავი?

- როდესაც "ჟუვენილ ა"-დან "ბარსა ბ"-ში გადავედი. ამ დროს, შენი ასაკის ფეხბურთელებთან თამაშს წყვეტ და შესაძლოა, 10 წლის უფროს მოთამაშეებს დაუპირისპირდე. ეს დიდი ნახტომია, რომელიც გაძლევს საშუალებას გაიგო, რა შეგიძლია და რა არა. არ მეგონა, თუ ყველაფერი ასე კარგად გამოვიდოდა, მაგრამ ვგრძნობდი, რომ პროფესიონალი ფეხბურთელი გავხდებოდი.

- ვინ იყო შენი კუმირი ბავშვობაში?

- გამოკვეთილი კუმირი არ მყოლია, მაგრამ ტაქტიკურად კარგად მოთამაშე ფეხბურთელები მიზიდავდნენ. მომწონდა პატრიკ ვიეირა, შემდეგ ჩავი და იაია ტურე. იაიასგან ბევრი ვისწავლე.

- გაგიმართლა, რომ "ბარსელონაში" გუნდის ისტორიაში საუკეთესო დროს მოხვდი...

- ამაზე ვერასდროს ვიოცნებებდი. მუშაობა უნდა განვაგრძოთ იმისათვის, რომ ეს ერა არ დასრულდეს.

- ბევრი რამ მოგიგია, მაგრამ რომელ მომენტს გამოარჩევდი?

- ესპანეთის ნაკრებთან ერთად მსოფლიო ჩემპიონატის მოგება. დამატებით ტაიმში მოგება, როდესაც თერთმეტმეტრიანების სერია ახლოვდებოდა... საკლუბო დონეზე, ტრებლი და სექსტეტი ბევრს ნიშნავდა, მაგრამ "უემბლიზე" ჩემპიონთა ლიგის მოგება განსაკუთრებული იყო იმ თამაშის გამო, რომლის წყალობითაც მოვიგეთ. ასევე ისეთი თანაგუნდელის გამო, როგორიც აბიდალია. ამ ფინალმა კარგი მოგონებები დამიტოვა.

- ბევრისთვის გასაოცრად, FIFA-ს წლის გუნდში ვერ მოხვდი. გეწყინა?

- ერთის მხრივ, აღიარება ყველას უხარია. მეორეს მხრივ, ვიცი, რომ მსგავსი პრიზები პოპულარობას მოაქვს. ამ გუნდში ბევრი ფეხბურთელი ვერ მოხვდა, რომლებსაც შესანიშნავი სეზონი ჰქონდათ. მათ შორის ისინიც, ვინც ჩემთან ერთად ტრებლი მოიგო. თუმცა, ისიც უნდა ითქვას, რომ ამ გუნდში მოხვედრილი ყველა მოთამაშე, ერთის გარდა, რომელიც დიდი ხნის განმავლობაში ტრავმირებული იყო, დიდი ფეხბურთელია. მე კი ვიცი, რომ კარგად ვიმუშავე და უფრო მნიშვნელოვანი ისაა, რომ გუნდთან ერთად ტრებლი მოვიგე, მოგვიანებით კი კიდევ ორი ტიტული დავამატე.

- ერთი შეხედვით ჩანს, რომ ბუსკეტსი პრესასთან ურთიერთობას ერიდება. რატომ?

- მედიის ყურადღების ცენტრში ყოფნა არ მიყვარს. სოციალურ ქსელებს არ ვიყენებ და ყურადღების მიქცევა არ მინდა. გადავწყვიტე, რომ უმჯობესია მოედანზე კარგად ვითამაშო და იმ ხალხის აღიარება დავიმსახურო, რომლებსაც ფეხბურთი უყვართ და ესმით. ამით ბედნიერი ვარ. მირჩევნია, სეზონის ბოლოს ტიტულები მოვიგოთ. ინდივიდუალური ჯილდოები ამის შემდეგ მოდის.

- დარწმუნებული ხარ, რომ ერთ დღესაც სოციალურ ქსელს არ შეუერთდები?

- (იცინის) ამაზე მიფიქრია. რთული გადასაწყვეტია. პირველ გუნდში გადმოსვლის შემდეგ, სოციალურ ქსელში ჩართვის აუცილებლობა ვერ დავიინახე. ჩვენ გვაქვს პრესა და ეს საკმარისია. ზოგჯერ, სოციალური მედია კარგია, ზოგჯერ კი, გვნებს. ბალანსი უნდა დაიცვა და იცოდე, როგორ გამოიყენო ის.

- ახალ კონტრაქტს გააფორმებ?

- როგორც პრეზიდენტმა მითხრა, კი. არ ვიცი, როდის მოხდება ეს, მაგრამ არ ვღელავ, რადგან ვიცი, რომ პრეზიდენტი სიტყვას შეასრულებს და იმედი მაქვს, ეს რაც შეიძლება მალე მოხდება.

- მალე მამა გახდები. როგორ შეცვლის ეს შენს ცხოვრებას?

- იმედი მაქვს, საფეხბურთო მოედანზე არაფერი შეიცვლება. პირად ცხოვრებაში კი, შეიძლება. შესაძლოა, არც ეს მოხდეს. მშვიდი ცხოვრებით ვცხოვრობ. ძირითადად სახლში ვარ. თუმცა, მალე, პრიორიტეტი ბავშვი გახდება.

- ბოლო კითხვა - "ატლეტიკო" "რეალზე" სერიოზული კონკურენტია?

- ამ დროისთვის, "ატლეტიკო" "რეალზე" ძლიერია. ყველას სჯერა, რომ ეს გუნდი ტიტულისთვის იბრძოლებს. ისინი გამუდმებით პროგრესირებენ. ამ გუნდს ძალიან კარგი ფეხბურთელები ჰყავს და მადრიდელები ლიდერთა შორის სეზონის ბოლომდე იქნებიან.