ესპანეთის თასის ფინალში რეკორდით

გუშინ, "მესტალიაზე" გამართული ესპანეთის თასის ნახევარფინალის განმეორებითი შეხვედრა "ბარსელონასთვის" ისტორიული გამოდგა. კატალონიურმა გუნდმა, ყველა ტურნირის გათვალისწინებით, ზედიზედ 29-ე წაუგებელი თამაში ჩაატარა, რაც კლუბის ისტორიაში პირველად მოხდა. აქამდე რეკორდი 28 წაუგებელი შეხვედრა იყო და ის 2010/2011 წლების სეზონში, პეპ გვარდიოლას გუნდმა დაამყარა.

"ბარსელონა" ესპანეთის თასის ფინალში ზედიზედ მესამედ გავიდა. ამ ტურნირზე ასეთი რამ უკანასკნელად 1996-1998 წლებში მოხდა და ფინალში ზედიზედ 3-ჯერ გასვლა მაშინაც "ბარსელონამ" შეძლო.

ასევე აღსანიშნავია, რომ "ბარსელონა", ბოლო 8 სეზონში, ესპანეთის თასის ფინალში მეექვსედ გავიდა. ასეთი წარმატებული პერიოდი აქამდე მხოლოდ "ბილბაოს" ჰქონია. ბასკები 1910-1916 წლებში ფინალში 6-ჯერ გავიდნენ.