ბრაიდა: "პოგბაზე უარი ფასის გამო ვთქვით"

"ბარსელონას" სპორტული დირექტორი არიედო ბრაიდან იმ მიზეზზე საუბრობს, რომლის გამოც, კატალონიურმა კლუბმა პოლ პოგბას შეძენაზე უარი თქვა. იტალიელის განცხადებით, ფრანგი ნახევარმცველი არარეალურად ძვირი ღირდა.

"ბარსელონამ" პოგბაზე უარი ეკონომიკური საკითხის გამო თქვა. ჩვენ მის სათამაშო თვისებებში ეჭვი არ გვეპარება. ვფიქრობ, ის თავის მაღალ კლასს "მანჩესტერ იუნაიტედში" დაამტკიცებს. თუმცა, ყოველ ჯერზე, როდესაც პოლი ამას ვერ გააკეთებს, ის კრიტიკის ობიექტი გახდება. გულშემატკივრებს, ემახსოვრებათ რა მისი ფასი, მოუნდებათ, რომ პოგბამ თამაშები მარტომ მოიგოს, ეს კი შეუძლებელია.

სატრანსფერო ბაზარზე ზოგიერთი ფეხბურთელის ფასი გაღიზიანებას იწვევს. ამხელა თანხა არცერთი მოთამაშე არ ღირს. ხელფასის გათვალისწინებით, ტრანსფერი 150 მილიონი ევრო ჯდებოდა, რაც რეალობას მოწყვეტილი რიცხვია.

გარდა ამისა, არავინ იცის, როგორ შეიძლება ფეხბურთელზე ამხელა ფასმა იმოქმედოს. შესაძლოა, არც იმოქმედოს, მაგრამ მასზე ზეწოლა ნამდვილად დიდი იქნება." - აცხადებს ბრაიდა.

შეეგახსენებთ, რომ პოგბა "იუვენტუსიდან" "მანჩესტერში" 105 მილიონი ევროს სანაცვლოდ დაბრუნდა, რაც მსოფლიო რეკორდია.