დიეგო სიმეონეს პრესკონფერენცია
"ბარსელონასა" და "ატლეტიკოს" შორის ჩასატარებელ შეხვედრამდე გაიმართა მადრიდელების მწვრთნელის, დიეგო სიმეონეს პრესკონფერენცია, რომლის დროსაც არგენტინელმა მეტოქე შეაქო. " "ბარსა" დღემდე დიდებულად თამაშობს. მას ჰყავს ფეხბურთელები, რომლებსაც მატჩის ბედის გადაწყვეტა შეუძლიათ როგორც ერთად, ისე ინდივიდუალურად. ჩემპიონთა ლიგის გარდა გასულ სეზონში ყველაფერი მოიგეს."
"ატლეტიკომ" ორჯერ გამოთიშა "ბარსა" ჩემპიონთა ლიგიდან, მაგრამ დიეგო სიმეონეს არასდროს არ მოუგია "კამპ ნოუზე": "ჩვენ რამდენჯერმე დავმარცხდით, რადგან "ბარსა" იმსახურებდა გამარჯვებას, ხოლო როდესაც ფრედ ვითამაშეთ, მაშინ ეს შედეგი დავიმსახურეთ. 90 წუთის განმავლობაში არ ვყოფილვართ მოგების ღირსნი. ჩემპიონთა ლიგის ზოგიერთი დაპირისპირებისას პირველებმა გავიტანეთ, მაგრამ საქმე ბოლომდე ვერცერთხელ ვერ მივიყვანეთ."
რაც შეეხება ოთხშაბათის მატჩს, მწვრთნელის თქმით, "უძლიერესი შეტევის ხაზი აქვთ "ბარსელონელებს", მაგრამ თუ თავს კარგად დავიცავთ, შანსი გვექნება." საკუთარ თავდამსხმელებთან დაკავშირებით, სიმეონემ ჟურნალისტები მინიშნებების გარეშე დატოვა. ასე რომ, გრიზმანთან ერთად მოედანზე შეიძლება ტორესი, კორეა ან გამეირო ვიხილოთ.
არგენტინელმა კომენტარი გააკეთა მადრიდელების ყოფილ და კატალონიელების ამჟამინდელ ფეხბურთელზე. "ჩვენი შეხედულება არდა თურანზე მუდამ დადებითი იქნება."
ბოლოს "ჩოლოს" კითხვა დაუსვეს ესპანური გუნდების იერარქიაში "ატლეტიკოს" ადგილის შესახებ. "არ ვცდილობთ, რომ სხვა კლუბებს მივუახლოვდეთ. ჩვენთვის აუცილებელია პროგრესი. ახალწვეულები ახალ შესაძლებლობებს აძლევენ გუნდის ნახევარდაცვასა და თავდასხმას, რადგან განსხვავებული თვისებები აქვთ."
ამ სიახლეზე კომენტარები გათიშულია.
კომენტარები [ 6 ]