"ბარსელონა" ვიდალს ბოლომდე ბრძოლას ურჩევს
"ბარსელონას" წარმომადგენლები გუნდის მარჯვენა მცველს, ალეიშ ვიდალს მოუწოდებენ რთული სიტუაციის მიუხედავად არ დანებდეს და სათამაშო დროის მოსაპოვებლად ბოლომდე იბრძოლოს.
ვიდალს, "ბარსელონაში" გადასვლის შემდეგ, კარგი დრო ნამდვილად არ უდგას. კატალონიურ კლუბში გადასვლიდან პირველი 6 თვის განმავლობაში მას თამაშის უფლება არ ჰქონდა, სეზონის მე-2 ნახევარი კი კატალონიელმა მცვლემა აშკარად ჩააგდო. ვიდალი იმედებს მიმდინარე სეზონზე ამყარებდა, მაგრამ პრიმერას 6 შეხვედრიდან მან მონაწილეობა მხოლოდ ერთში მიიღო. ბოლო მატჩებში ვიდალი გუნდის განაცხადშიც კი ვერ ხვდება.
გავრცელებული ინფორმაციით, 27 წლის ფეხბურთელი გუნდის იანვარში გამოცვლას გეგმავს. მისით იტალიური კლუბები არიან დაინტერესებულნი.
თუმცა, თუ Mundo Deportivo-ს დავუჯერებთ, კატალონიური კლუბის წარმომადგენლებს ფეხბურთელი იოლად არ ეთმობათ. "ბარსას" სპორტული დირექტორი რობერტ ფერნანდესი, ვიდალს შეხვდა და შეეცადა ის დაერწმუნებინა, რომ ხელები არ ჩამოუშვას და ლუის ენრიკეს ნდობის მოსაპოვებლად ბოლომდე იბრძოლოს.
ამ სიახლეზე კომენტარები გათიშულია.
კომენტარები [ 5 ]