მარლონმა ლუის ენრიკეს თავი მოაწონა

"ბარსელონა ბ"-ს ბრაზილიელმა ცენტრალურმა მცველმა, მარლონ სანტოსმა, ის დრო, რომელიც მან პირველ გუნდთან ერთად გაატარა, ძალიან ნაყოფიერად გამოიყენა და ლუის ენრიკეს თავი მოაწონა. ამ ინფორმაციას Sport ავრცელებს.

ჟერარ პიკესა და ჟერემი მატიეს ტრავმების დროს, ხავიერ მასკერანოსა და სამუელ უმტიტის რეზერვისტად სწორედ მარლონი მოიაზრებოდა, რომელიც ბოლო მატჩების განაცხადშიც ხვდებოდა. ლუის ენრიკეს განკარგულებაში ის 2 კვირის განმავლობაში იყო. დროის ამ მონაკვეთში, ახალგაზრდა ბრაზილიელმა მთავარი მწვრთნელი თავის შესაძლებელობებში დაარწმუნა. რა თქმა უნდა, მარლონს მომატება მართებს, მაგრამ მას უკვე აქვს ის თვისებები, რომელთა განვითარების შემთხვევაშიც, 21 წლის ფეხბურთელს შეუძლია "ბარსას" პირველი გუნდის უცვლელი წევრი გახდეს.

მარლონი ფიზიკურად ძლიერი მცველია, რომელიც ორთაბრძოლებში უშიშრად შედის. ის ბურთის შენარჩნებაშიც კარგადაა დახელოვნებული.

სამწვრთნელო შტაბის აზრით, მარლონს შეუძლია ისეთი გადაცემები აკეთოს, რომლებიც მეტოქე გუნდის დაცვაში არეულობას შეიტანს. მას კარგი გრძელი პასი აქვს. თუმცა, ამ საქმეში გამბედაობის ნაკლებობის გამო, ის ასეთი პასების გაკეთებას, ჯერჯერობით, ერიდება.

მარლონი "ბარსა ბ"-ს უბრუნდება. მის გუნდს, შაბათს, "ბადალონასთან" აქვს თამაში. კატალონიელთა მე-2 გუნდის მაისურით მარლონმა 4 თამაში ჩაატარა და "ბარსა ბ"-მ, ამ შეხვედრებში, მხოლოდ 1 გოლი გაუშვა, ისიც თერთმეტმეტრიანიდან.