"ოქროს ბურთი" ახალი/ძველი სისტემა მესისა და რონალდუს ჰეგემონიას ემუქრება

"ოქროს ბურთის" გამარჯვებულის გამოვლენის წესსში ძველი, 2009 წლის რეგულაციების დაბრუნება ნიშნავს, რომ ლიონელ მესისა და კრიშტიანუ რონალდუს ჰეგემონია დასასრულს უახლოდება.

მას შემდეგ, რაც France Football-მა და FIFA-მ მსოფლიოს საუკეთესო ფეხბურთელის ერთობლივად გამოვლენა დაიწყეს, ამ ჯილდოს მხოლოდ 2 ფეხბურთელი იგებდა - 4-ჯერ ის ლიონელ მესიმ მიისაკუთრა, ხოლო 2-ჯერ - კრიშტიანუ რონალდუმ.

არგენტინელისა და პორტუგალიელის ჰეგემონიის მიზეზი ისაა, რომ France Football-მა და FIFA-მ გამარჯვებულის გამოვლენის წესები გააერთიანეს. ჯილდოს ის მიიღებდა, ვინც ეროვნული ნაკრებების მწვრთნელებისა და კაპიტნებისგან, ასევე ჟურნალისტებისგან მეტ ხმას მოაგროვებდა.

2009 წლამდე, France Football გამარჯვებულს მხოლოდ ჟურნალისტებს შორის ჩატარებული გამოკითხვით ადგენდა. ეს წესი რომ 2009-2016 წლებშიც შენარჩუნებულიყო, 2010 წელს ჯილდოს, მესის ნაცვლად, ვესლი სნეიდერი მოიგებდა, ხოლო 2013 წელს, რონალდუს ნაცვლად, ფრანკ რიბერი.

France Football-მა და FIFA-მ ამ საკითხში თანამშრომლობა შეწყვიტეს და "ოქროს ბურთს" კვლავ ფრანგული გამოცემა, ძველი სისტემით, ანუ მხოლოდ ჟურნალისტებს შორის გამოკითხვით ჩაატარებს. ეს კი ნიშნავს, რომ მესისა და რონალდუს კონკურენტების შანსები იზრდება.