ინიესტა ძალებს არ იშურებს

ანდრეს ინიესტა 3 დეკემბრამდე გამოჯანმრთელებას ცდილობს. აღნიშნულ დღეს, კატალონიის "ბარსელონა" საშინაო არენაზე მადრიდის "რეალს" დაუპირისპირდება.

ესპანელი ლეგენდის "ელ კლასიკომდე" გამოჯანმრთელება საოცრება იქნება, რადგან მუხლის იოგების ტრავმის გამო, მან წესით და რიგით დიდი ხნით უნდა იუქმოს.

22 ოქტომბერს, ენცო პერესთან შეჯახების შემდეგ, ფეხბურთელმა სერიოზული დაზიანება მიიღო. სამედიცინო შემოწმების შემდეგ ცნობილი გახდა, რომ ტრავმის გამო ინიესტა 6 დან 8 კვირამდე იუქმებდა.

3 დეკემბერს მე-6 კვირა შესრულდება, მაგრამ ეს ხომ ინიესტაა. ესპანელი ნახევარმცველი ძალებს არ იშურებს. რამდენიმე დღის წინ ფეხბურთელმა სოციალურ მედიაში ფოტო განათავსა წარწერით: "კიდევ ერთი ნაბიჯი".

"კლასიკომდე" 2 კვირაა დარჩენილი, კატალონიური კლუბის კაპიტანი ძალიან დიდ პროგრესს განიცდის. გამოჯანმრთელების პროცესი ამაზე კარგად ვერ წარიმართებოდა.

ინიესტა გამოჯანმრთელების პროცესის მესამე ფაზაზე უნდა გადავიდეს, რაც ბურთთან ადაპტაციას და ჯგუფთან შეერთებას მოიცავს.

მოსალოდნელია, რომ 10 დღეში ანდრესი გუნდს შეუერთდება. მას მადრიდულ კლუბთან მატჩისთვის მოსამზადებლად კიდევ ექნება დრო.