სილესენმა დაზიანება მოირჩინა

კატალონიის "ბარსელონას" ჰოლანდიელმა მეკარემ, იასპერ სილესენმა დაზიანება მოიშუშა.

დეკემბრის ბოლოს 27 წლის კარის დარაჯმა მარცხენა ფეხის წვივის კუნთები დაიზიანა. მოსალოდნელი იყო, რომ იასპერი დაახლოებით 2 კვირას გამოტოვებდა. გუშინ მან პარტნიორებთან ერთად სავარჯიშო სესიაში მონაწილეობა მიიღო.

სავსებით შესაძლებელია, რომ იასპერი ესპანეთის თასის 1/8 ფინალის საპასუხო მატჩში "ატლეტიკის" წინააღმდეგ მოედანზე გამოვა. პირველი დაპირისპირება ბილბაოში, კატალონიელთა მარცხით, ანგარიშით 1:2 დასრულდა.

სილესენი "ბარსელონაში" "აიაქსიდან" გადავიდა. ჯერჯერობით, მას კატალონიურ კლუბში მარკ-ანდრე ტერ შტეგენის რეზერვისტის როლი აქვს.