ტიტულისთვის ბრძოლა გრძელდება

სულ ცოტა ხნის წინ დასრულდა ლა ლიგის 28-ე ტურის მატჩი, სადაც ერთმანეთს "ბარსელონა" და "ვალენსია" დაუპირისპირდნენ. საზოგადოებამ უხვგოლიანი, დრამატული და ლამაზი შეხვედრა იხილა. ლუის ენრიკეს კოლექტივმა მორიგი 3 ქულა ჩაიწერა აქტივში.

როგორც მოსალოდნელი იყო, მატჩი "ბარსელონას" უპირატესობით წარიმართა. კატალონიურმა გუნდმა ჩვეულ სტილში ბურთი გააკონტროლა და მეტოქის კარში უამრავი სახიფათო მომენტი შექმნა.

მიუხედავად საწყის წუთებში მოპოვებული უპირატესობისა, პირველი გოლი სტუმრებმა გაიტანეს. თავი ელიაკიმ მანგალამ გამოიჩინა, რომელიც მოგვიანებით მთავარმა არბიტრმა მოედნიდან გააძევა (44').

მანგალას გოლს სუარესმა 6 წუთში უპასუხა, ტაიმის მიწურულს კი ლიონელ მესიმ 10 კაცით დარჩენილ "ვალენსიას" თერთმეტმეტრიანი გაუტანა. ამას თითქოს, სტუმარი გუნდი უნდა გაეტეხა, მაგრამ "ღამურებმა" ბრძოლა განაგრძეს. მუნირ ელ ჰადადიმ მოულოდნელად, წონასწორობა აღადგინა 2:2.

მეორე ტაიმში ლუის ენრიკეს კოლექტივმა 2 უპასუხო გოლი გაიტანა.

"ბარსელონას" რიგებში მე-100 დუბლი გაიფორმა ლიონელ მესიმ, 89-ე წუთზე კი ანდრე გომეშმა ნეიმარის გადაცემის შემდეგ, სადებიუტო გოლი გაიტანა კატალონიური კლუბის რიგებში და შეხვედრას წერტილი დაუსვა.

28 მატჩში ლუის ენრიკეს "ბარსელონამ" 63 ქულა მოიპოვა. "ბლაუგრანა" მადრიდის "რეალს" ჩამორჩება (65), რომელსაც თადარიგში ერთი შეხვედრა აქვს. მომდევნო ტურში კატალონიური კლუბი "ნუევო ლოს კარმენესზე" "გრანადას" დაუპირისპირდება.