"ბარსელონამ" და "ატლეტიკომ" 2008 წელს ნავასზე უარი თქვეს

საინტერესო ინფორმაციას ავრცელებს ესპანური AS, რომლის თანახმადაც კატალონიის "ბარსელონასა" და მადრიდის "ატლეტიკოს" 2008 წელს "რეალის" ამჟამინდელი მეკარის, კეილორ ნავასის შეძენა შეეძლოთ. "არავინ იყიდიდა მეკარეს კოსტა რიკიდან" - ვკითხულობთ სტატიაში ფეხბურთელის აგენტის სიტყვებს.

კეილორ ნავასმა წელს ბრწყინვალე სეზონი ჩაატარა - შესანიშნავად გამოიყურებოდა ჩემპიონთა ლიგაზე, განსაკუთრებით "იუვენტუსისა" და "ატლეტიკოს" წინააღმდეგ. გოლკიპერს კარგი სეზონი ჰქონდა ლა ლიგაშიც და თავის გუნდს 33-ე ტიტულის აღმართვაშიც დაეხმარა.

თუმცა, 9 წლის წინ ყველაფერი სხვაგვარად შეიძლებოდა განვითარებულიყო. მაშინ, კეილორზე ლა ლიგის ყველა ძლიერმა კლუბმა უარი თქვა. როგორც რიკარდო კაბანიასმა კოსტა რიკულ სატელევიზიო გადაცემაში განაცხადა, ძალიან რთული იყო ესპანური გრანდების დარწმუნება კიპერის უდიდეს პოტენციალში.

"მე აქ (კოსტა რიკაში) 2008 წელს ჩამოვედი იმ ვიდეოების ნახვის შემდეგ, რომლებიც ლუის გაბელო კონეხომ მაჩვენა. ასევე, ორი კვირა ვაკვირდებოდი ეროვნული ნაკრების ვარჯიშებსაც. შემდეგ ვნახე მატჩი "დისი იუნაიტედსა" და "საპრისას" შორის და ეს ყველაფერი საოცარი იყო. ჩემს თავს ვეკითხებოდი, თუ ვინ იყო ეს მეკარე, რომელმაც ასე მიიპყრო ჩემი მთელი ყურადღება." - განაცხადა კაბანიასმა.

მას შემდეგ, რაც აგენტმა მისი თამაში იხილა ეროვნული ნაკრების მაისურით, იფიქრა, რომ ყველაფერი უნდა გაეკეთებინა იმისათვის, რომ ეს ფეხბურთელი ესპანეთის სამ უძლიერეს გუნდს შორის რომელიმეში აღმოჩენილიყო - "ბარსელონა", "რეალი" ან "ატლეტიკო". "ყველა მათგანს დეტალური მოხსენება და კეილორის თამაშის ამსახველი ვიდეო კადრები, თუმცა ყველამ უარით გამომისტუმრა." აგენტი ასევე იხსენებს პეპ გვარდიოლას ერთ-ერთი ასისტენტის სიტყვებს: "ის კარგი ფეხბურთელია რიკარდო, მაგრამ არავინ იყიდის მეკარეს კოსტა რიკიდან - ყოველ შემთხვევაში, არც ერთი დიდი კლუბი..."