საული - ვერატის ალტერნატივა

თუ კატალონიის "ბარსელონა" პსჟ-სთან შეთანხმებას ვერ მიაღწევს მარკო ვერატის ტრანსფერთან დაკავშირებით, კლუბი მზადაა განიხილოს საულ ნიგესის ვარიანტი.

გავრცელებული ინფორმაციით, რობერტ ფერნანდესი 21 წლამდელთა ევროპის ჩემპიონატზე გაემგზავრება, რათა ნახევარფინალში "ატლეტიკოს" ფეხბურთელის თამაშს დააკვირდეს.

რა თქმა უნდა, მარტივი არც ამ ტრანსფერის გაჩარხვა იქნება, რადგან მადრიდელებს ფიფას მიერ დაწესებული ბანის გამო ფეხბურთელების გაფორმება არ შეუძლიათ და ეს ამცირებს იმის შანსებს, რომ ისინი რომელიმე ფეხბურთელს შეელევიან. თუმცა მეორე მხრივ, "ბარსელონას" ხელმძღვანელობის აზრით საული ზუსტად მოერგება "ბარსელონას" ცენტრს და მის მიმართ ინტერესიც ახალი არ არის.

"ბლაუგრანაში" ფიქრობენ, რომ ერნესტო ვალვერდეს შემადგენლობაში საული შესანიშნავად ჩაჯდება ტაქტიკაში 4-3-3. კატალონიელები ფეხბურთელს წინა სეზონშიც აკვირდებოდნენ და თითქმის ყველა მატჩი განიხილეს (33 მატჩი ლა ლიგაში - 2544 წუთი, 12 ჩემპიონთა ლიგაზე - 839 წუთი, 8 კოპა დელ რეიზე - 632 წუთი). ფეხბურთელის ასაკიც საკმაოდ ხელსაყრელია, იგი 14 ნოემბერს 23 წლის გახდება.

როგორც უკვე აღვნიშნეთ, AS-ის მიერ გავრცელებული ინფორმაციით, რობერტ ფერნანდესი, რომელიც "ბარსელონას" სპორტული დირექტორია, 21 წლამდელთა ევროპის ჩემპიონატზე გაემგზავრება. საული ტურნირის ერთ-ერთი საუკეთესო მოთამაშეა და შესანიშნავ მატჩებს ატარებს. კატალონიელები ხორხე მენდეშსაც დაუკავშირდნენ, რომელმაც მათ ფეხბურთელის ფასი გააცნო - 80 მილიონი ევრო.

საულს ბევრი დადებითი თვისება აქვს - ბურთის შესანიშნავი კონტროლი, შრომისუნარიანობა მოედნის ყველაზე მნიშვნელოვან ნაწილში და ამასთანავე შექმნილი მომენტის დასრულება - ფეხბურთელის ანგარიშზე გასულ 3 სეზონში ყველა ტურნირზე გატანილი 22 გოლია, რაც მისი პოზიციიდან გამომდინარე შესანიშნავი შედეგია. მას არ აკლია დაცვითი უნარებიც, რასაც აქტიურად ავლენდა 2013/14 წლების სეზონში "რაიო ვალიეკანოს" შემადგენლობაში.