ვერატი - არშემდგარი ტრანსფერი თუ ახალი სტრატეგია?

მარკო ვერატიმ გუშინ სიჩუმე დაარღვია. ფეხბურთელმა, რომელიც სავარჯიშო სესიას პსჟ-სთან ერთად დაუბრუნდა ოორედოში, ჟურნალისტებთან ისაუბრა და თავისი აგენტის, დონატო დი კამპლის განცხადების გამო ბოდიში მოიხადა, რომელმაც Corriere dello Sport-თან ინტერვიუში მკაცრად გააკრიტიკა კლუბის პრეზიდენტი ნასერ ალ-ხელაიფი და განაცხადა, რომ ვერატი პარიზელთა ტყვეა.

Mundo Deportivo-ს ინფორმაციით, ეს ვერატის ახალი სტრატეგიაა, რომელმაც ერთი ნაბიჯით უკან დახევა ამჯობინა და ფანებსა და პრეზიდენტს ბოდიში მოუხადა.

როგორც მოგეხსენებათ, მიუხედავად იმისა, რომ გამიზნული იყო ინტერვიუ, ჯამში გამოვიდა ვიდეო, სადაც ფეხბურთელის მონოლოგია ასახული, რომელსაც შესაძლოა ბოდიშის მოხდა აიძულეს კიდეც. "რთული დღეები მქონდა და დღეს დილით წავიკითხე ჩემი წარმომადგენლის სიტყვები და მინდა გითხრათ, რომ მე ასე არ ვფიქრობ. მინდა ბოდიში მოვუხადო გულშემატკივრებს, პრეზიდენტს და ყველა იმ ადამიანს, ვინც აქ მუშაობს. მე აქ ვარ და ვარჯიშს დავუბრუნდი. აქ დაბრუნებით ბედნიერი ვარ. ვიცი, რომ კლუბი მენდობა. პსჟ-ს დიდ პატივს ვცემ. თუ 5 წლის შემდეგ კარგი ფეხბურთელი გავხდი, ეს სწორედ ამ გუნდის დამსახურებაა. გუნდის, რომელიც თავიდანვე მენდობოდა და სწორედ ამიტომ ვიხდი ბოდიშს. ჩემს აგენტს შეეშალა - რადგან როგორც ვთქვი, მე ასე არ ვფიქრობ. მინდა, რომ ყველა დაწყნარდეს. რაც აქ ვარ, ჩემი შესაძლებლობების 100%ს ვხარჯავ და ასეც გავაგრძელებ."

მიუხედავად თავისი აგენტის სიტყვების გამო ბოდიშის მოხდისა, ვერატის გადაჭრით არ უთქვამს, რომ იგი პარიზულ კლუბში რჩება.

რაოდენ რთული დასაჯერებელიც არ უნდა იყოს, წყაროები მის ამ ნაბიჯს სტრატეგიის ნაწილად ნათლავენ, რათა ფეხბურთელს საშუალება მიეცეს მომდევნო სეზონში "ბარსელონას" ფორმა ჩაიცვას და ნასერ ალ-ხელაიფიც დაარწმუნოს, რომ მოუსმინოს კატალონიელთა შეთავაზებებს. სტატიაში იმასაც ვკითხულობთ, რომ ვერატი რომ თავის აგენტს აჰყოლოდა, სატრანსფერო საგა ფაქტობრივად დასრულებული იქნებოდა და "ბლაუგრანასაც" არანაირი შანსი არ ექნებოდა.

ვერატის მიზანი ყველასთვის ნათელია - მის ირგვლივ ატეხილი აურზაურის დამშვიდება და ამისთვის ბოდიშის მოხდაც არ გასჭირვებია და არც იმის გახსენება, რომ სადამდეც მოვიდა, პსჟ-ს დამსახურებაა. ერთი ნაბიჯით უკან, მიზნისკენ კი ორი ნაბიჯით წინ? აღნიშნულ გამოცემასთან ბართომეუმაც განაცხადა, რომ ვერატის ინტერესის შესახებ და დაამატა, რომ მათ მოთმინება მართებთ და დაელოდებიან, როდის გააცნობიერებს ნასერ ალ-ხელაიფი, რომ ფეხბურთელს მისი სურვილის მიუხედავად კლუბში ვერ გააჩერებ. სატრანსფერო ფანჯარა ახლახანს გაიხსნა და 31 აგვისტომდე წინ კიდევ 7 კვირაა. ფეხბურთელის სტრატეგია კი სწორედ ამ თარიღამდეა გათვლილი.