ჩავი ახალგაზრდებს ემუქრება: "ბარსელონაში" არ დაგაბრუნებთ!"

"ბარსელონას" ლეგენდა ჩავი ერნანდესი ახალგაზრდა ფეხბურთელების მიერ კატალონიური კლუბის დატოვებაზე საუბრობს. ვეტერანი ესპანელის თქმით, მისი ნება რომ იყოს, არცერთ მათგანს გუნდში არ დააბრუნებდა.

"ბელერინი? მისი ბევრი თამაში არ მინახავს. მხოლოდ იმას გეტყვით, რომ ჩემთვის ძნელია, დავეთანხმო იმ ფეხბურთელების შეძენას, რომლებიც კლუბში უკვე იყვნენ. მე ასეთ ფეხბურთელებს არ შევიძენდი. რატომ ტოვებენ ისინი გუნდს 16-17 წლის ასაკში? ეს გულდასაწყვეტია. მე მათი არ მესმის.

ემბულასა და ერიკ გარსიას წასვლა? ამ გადაწყვეტილებებმა გამაკვირვა. მომავალში მათ კლუბში არ დავაბრუნებ. ასეთია ჩემი ფილოსოფია.

ფეხბურთელმა გუნდი განვითარების ეტაპზე არ უნდა დატოვოს. როდესაც 16 წლის ვიყავი, წასვლის სურვილი არ მქონდა. ვგრძნობდი, რომ საუკეთესო ადგილას ვიმყოფებოდი. თუ "ჩელსი" ან "იუნაიტედი" მიმიწვევდნენ, მათ უარს ვეტყოდი.

"ბარსელონამ" თავისი ფეხბურთელები უნდა გაზარდოს. ახალგაზრდები ასე არ უნდა მიდიოდნენ.

პირველ გუნდში ადგილის დამკვიდრება ადვილი არასდროს ყოფილა. ეს მეც გამიჭირდა.

ამჟამად, კლუბში ალენია, მარლონი და კუკურელია იმყოფებიან, რომლებსაც დიდი პოტენციალი აქვთ. თუმცა, ძნელია 19 წლის ასაკში საუკეთესო იყო." - აცხადებს ჩავი, რომელმაც, ცოტა ხნის წინ, "ბარსელონას" გაწვრთნის სურვილი კიდევ ერთხელ დააფიქსირა.

ჩავის, "ბარსელონური" კარიერის დროს, რამდენჯერმე უთამაშია ისეთი ფეხბურთელის გვერდით, რომელიც "ბარსელონას" სკოლის აღზრდილია, რომელმაც კატალონიური გუნდი ახალგაზრდა ასაკში დატოვა და შემდეგ დაბრუნდა. მაგალითად, ჟერარ პიკე, ჟორდი ალბა, სესკ ფაბრეგასი და ჟერარ ლოპესი.