მინო რაიოლა ვერატის აგენტი გახდა

როგორც ჩანს, მარკო ვერატი კატალონიურ გრანდს კიდევ უფრო შორდება. მოლაპარაკებები ისედაც თითქმის სრულიად წარუმატებლად მიმდინარეობდა და კატალონიელთა გულშემატკივრების ერთადერთ იმედად ის ზეწოლა რჩებოდა, რომელიც საკუთარ კლუბზე თავად ფეხბურთელს უნდა მოეხდინა. ეს კი დონატო დი კამპლიმაც არ დააკლო, როცა ნასერ ალ-ხელაიფი მკაცრად გააკრიტიკა და განაცხადა, რომ ვერატი პარიზელთა ტყვეა. გუშინ კი ფეხბურთელმა ოფიციალურად დაადასტურა, რომ მის ინტერესებს დი კამპლი აღარ დაიცავს და მის ადგილს მსოფლიოში ერთ-ერთი ყველაზე ცნობილი აგენტი, მინო რაიოლა დაიკავებს.

აღსანიშნავია, რომ ინფორმაციის გაოფიციალურებამდე, რამდენიმე კვირის განმავლობაში იწერებოდა დი კამპლისა და ვერატის შორის ურთიერთობის გაფუჭების შესახებ. განსაკუთრებით კი იტალიური პრესა აქტიურობდა. რამდენიმე კვირის წინ აგენტმა სოციალურ ქსელში ვერატისთან ერთად ფოტოც გამოაქვეყნა წარწერით "მხოლოდ ერთი რამ", თუმცა როგორც ჩანს, უახლოეს დღეებში ყველაფერი მკვეთრად შეიცვალა.

აღნიშნული ფოტოს გამოქვეყნებიდან 1 თვისა და 4 დღის შემდეგ, უკვე ფეხბურთელმაც განაცხადა, რომ დი კამპლი მის ინტერესებს აღარ დაიცავს. "ვადასტურებ, რომ დღეიდან ჩემს სპორტულ ინტერესებს მხოლოდ მინო რაიოლა დაიცავს. მადლობას ვუხდი დონატო დი კამპლის აქამდე შესრულებული მუშაობის გამო." - დაწერა პსჟ-ს ნახევარმცელმა სოციალურ ქსელ Instagram-ზე.

კიდევ ერთხელ გავიხსენოთ ის ფაქტი, რომ ვერატისა და მისი აწ უკვე ყოფილი აგენტის გზები გაიყო. რამდენიმე კვირის წინ, ვერატის ოფიციალური ინტერვიუ გავრცელდა, სადაც იგი ბოდიშს უხდის პსჟ-ს ფანებსა და მომუშავე პერსონალს დი კამპლის სიტყვების გამო და აღნიშნავს, რომ ეს მისი პოზიცია არაა. რაც შეეხება რაიოლას, თუ ზლატან იბრაჰიმოვიჩის ირგვლივ განვითარებულ მოვლენებს გავიხსენებთ, მას კატალონიურ გრანდთან მთლად კარგი ურთიერთობა არ აკავშირებს. ესპანური პრესა ვერატის ამ გადაწყვეტილებას ნათლავს როგორც მის მიერ კონტრაქტის გახანგრძლივებისკენ გადადგმულ პირველ ნაბიჯებს.