Sport-მა უახლესი ცნობები შეაჯამა - სიტუაცია საგანგაშოა!!!

რამდენიმე წუთის წინ, კატალონიურმა Sport-მა ნეიმარის ირგვლივ შექმნილი სიტუაცია შეაჯამა და უკანასკნელ ცნობებს თავი მოუყარა.

შედეგი დამაიმედებელი არაა. წყაროს ცნობით, ნეიმარი ამერიკიდან ბარსელონაში აღარ დაბრუნდება და "ბარსას" ტურის შემდეგ, პირდაპირ პარიზში გაფრინდება.

კლუბში შექმნილი სიტუაციით შეშფოთებულები არიან და ცდილობენ სიტუაცია კულუარულად დაარეგულირონ ისე, რომ დამატებითი ცნობები პრესაში არ გავრცელდეს. თუმცა, ეს ძალიან ძნელია, როდესაც საქმე ასეთი დონის ფეხბურთელს ეხება, რომელიც შენთან თავს კომფორტულად ვერ გრძნობს.

რობერტ ფერნანდესი, ჟორდი მესტრე და ჟოსეპ ვივესი, კამერების წინ, სტანდარტულ განცხადებებს აკეთებენ და ქმნიან ილუზიას, რომ ყველაფერი კარგადაა. თუმცა, დახურულ კარს მიღმა, მათი კომენტარები სხვაგვარია.

"სიტუაცია საშიშია. არსებობს რეალური საფრთხე, რომ ნეიმარმა მიმდინარე ზაფხულში დაგვტოვოს. ვიტყოდი, რომ ამის შანსი 50%-ს უდრის." - ციტირებს "ბარსელონას" ერთ-ერთ დირექტორს Sport.

"ბარსელონას" კვლავ სურს, რომ ნეიმარმა საჯარო განცხადება გააკეთოს, მაგრამ ბრაზილიელი კვალვ დუმს, თუ მის მიერ Instagram-ზე დადებულ პოსტს არ ჩავთვლით.

ბრაზილიური პრესის ცნობით, ნეიმარს კატალონიელი ჟურნალისტების კითხვებზე პასუხის გაცემა არ სურს. ამის გამო, ის ბარსელონაში არ დაბრუნდება და პირდაპირ პარიზში გაემგზავრება. Esporte Interativo-ს ინფორმაციით კი, ყველაფერი უახლოეს ორ კვირაში გადაწყდება.