"ლივერპულმა" კოუტინიოს ფასი დაადო
ბრაზილიის ნაკრების ლიდერი და ერთ-ერთი ყველაზე ნიჭიერი ფეხბურთელი, იურგენ კლოპის "ლივერპულის" ერთ-ერთი საკვანძო ფიგურა, ფილიპე კოუტინიო უკვე რამდენიმე თვეა "ბარსელონას" რადარზეა.
როგორც წინა დღეებში გავრცელდა ინფორმაცია, კატალონიელთა წარმომადგენლები ინგლისში ჩაფრინდნენ ტრანსფერზე მოლაპარაკებების გასამართად. თავად ფეხბურთელს, ლურჯ-ბროწეულისფერი ფორმის მორგება სურს და საჭირო ნაბიჯების გადასადგმელად მზადაა.
მთავარი განსხვავება ახლანდელი და 3 თვის წინანდელ სიტუაციებს შორის კი ფასია. მიმდინარე ზაფხულის სატრანსფერო ფანჯარაზე უკვე ისეთი თანხები ფიგურირებს, რომ გასული თვეების 80 მილიონიანი ფეხბურთელი ახლა თითქმის ორმაგად ფასობს.
თავის მხრივ კი "ლივერპული" მზადაა მოლაპარაკებების გასამართად და ბრაზილიელის სანაცვლოდ 150 მილიონ ევროს ითხოვს. აღსანიშნავია, რომ ამ ფასმა არა მხოლოდ კატალონიელები, არამედ პარიზელებიც დაამწუხრა, რომლებიც ასევე ცდილობენ მერსესაიდელთა ათიანის გადაბირებას.
თუ კატალონიელებმა პსჟ-ს დამარცხება ვერატის ტრანსფერში ვერ შეძლეს, კოუტინიოს საქმეში ვითარება განსხვავებულია.
"ლივერპულის" უარის მთავარი მიზეზი არა პსჟ-ს მსგავსი ეკონომიკური მდგომარეობა და თითქმის შეუზღუდავი ფინანსური შესაძლებლობები, არამედ ისაა, რომ ინგლისურ კლუბს ლიდერის გაშვება არ სურს. "ენფილდის" მკვიდრთ უკვე დიდი ხანია მნიშვნელოვანი ტიტული არ მოუგიათ და პრემიერ ლიგასა და ჩემპიონთა ლიგაზეც შესანიშნავი ისტორიის მქონე გუნდი საკმაოდ წარუმატებლად ასპარეზობს.
გარდა ამისა, მათ საკმაოდ ამბიციური და ქარიზმატული მწვრთნელი ჰყავთ - იურგენ კლოპი, რომელსაც სურს ძლიერი და კონკურენტუნარიანი გუნდის აშენება და ლიდერად სწორედ ფილიპე კოუტინიო ჰყავს წარმოდგენილი.
მიუხედავად ამისა, კლუბებს საკმაოდ კარგი სატრანსფერო ისტორია აკავშირებთ. გავიხსენოთ ლუის სუარესის ტრანსფერი - "ლივერპულმა" თავიდანვე უარყო შემოთავაზებები, თუმცა ფორვარდის ზეწოლამ და კატალონიელთა 80 მილიონიანმა წინადადებამ თავისი გააკეთა.
მომდევნო კვირაში პრესის ინფორმაციით "ბარსელონა" პირველ ოფიციალურ შეთავაზებას გააკეთებს. თუმცა ეს თავდაპირველად, სავარაუდოდ 80 მილიონს არ გადააჭარბებს.
ამ სიახლეზე კომენტარები გათიშულია.
კომენტარები [ 12 ]