კრისტიან ტელიომ ზაფხულში სპარტაკზე უარი ბოლო მომენტში თქვა

26 წლის თავდამსხმელი კრისტიან ტელიო გასულ ზაფხულში "ბარსელონადან" "სპარტაკში" გადასვლასთან ძალიან ახლოს იყო. ამ ინფორმაციას კატალონიური Webola ავრცელებს.

წყაროს ცნობით, კლუბებს ტრანსფერის პირობები უკვე შეთანხმებული ჰქონდათ - ტელიო "სპარტაკში" 10 მილიონ ევროდ უნდა გადასულიყო. თუმცა, ტრანსფერის ოფიციალურად გამოცხადებამდე ერთი დღით ადრე ფეხბურთელმა რუსეთში გადასვლაზე უარი თქვა. შედეგად, ტელიო "ბეტისში" 4 მილიონ ევროდ გადავიდა.

"ბარსელონას" მუნირ ელ ჰადადის გაყიდვაც სარფიანად უნდოდა. კატალონიურ კლუბს 22 წლის თავდამსხმელის გაშვება "ზენიტში" 20 მილიონ ევროდ სურდა, თუმცა ფეხბურთელმა რუსეთში გადაბარგებაზე უარი თქვა და "ალავესში" იჯარით გადავიდა.

ტელიომ გასული სეზონი იჯარით "ფიორენტინაში" ჩაატარა. მან იტალიის ჩემპიონატში 36 მატჩი ჩაატარა და 4 გოლი გაიტანა. რაც შეეხება მუნირს, მის ანგარიშზე "ვალენსიაში" ჩატარებულ სეზონში 33 მატჩი და 6 გოლია.