ემილიო ბუტრაგენიო: "ბარსელონამ" დაგვსაჯა
მადრიდის "რეალის" ყოფილი ფეხბურთელი და ამჟამინდელი დირექტორი ემილიო ბუტრაგენიო შაბათს გამართულ "ელ კლასიკოზე" საუბრობს და აცხადებს, რომ დიდი ჩამორჩენის მიუხედავად, მისი კლუბი ჩემპიონობისთვის ბრძოლას არ წყვეტს.
"გუნდებს შორის სხვაობა ნამდვილად სერიოზულია, მაგრამ ჩვენი კლუბის ემბლება ბოლომდე ბრძოლას გვაიძულებს. წინ კიდევ ბევრი მატჩია. საჩემპიონო ბრძოლა ჯერ არ დასრულებულა.
პირველი ტაიმი თანაბარი გამოვიდა. შესაძლოა, ცოტათი უკეთ ჩვენ გამოვიყურებოდით, რადგან უფრო მეტი მომენტი გვქონდა. ისე ჩანდა, რომ რომელი გუნდიც ანგარიშს გახსნიდა, დიდ უპირატესობას მოიპოვებდა.
"ბარსელონამ" პირველი ტაიმი აქტიურად დაიწყო და დაცვაში დაშვებული შეცდომისთვის დაგვსაჯა. ამის შემდეგ, კატალონიელები თავს უფრო კომფორტულად გრძნობდნენ.
როდესაც "რეალი" მოედანზე 10 კაცით დარჩა, მისია ფაქტობრივად შეუსრულებელი გახდა. ამის მიუხედავად, სხვაობის შემცირება შეგვეძლო. ეს შანსი რომ გამოგვეყენებინა, შესაძლოა, მოვლენები სხვაგვარად განვითარებულიყო." - ციტირებს ბუტრაგენიოს სიტყვებს Marca.
ამ სიახლეზე კომენტარები გათიშულია.
კომენტარები [ 4 ]