უსმან დემბელეს პრობლემები და მათი გადაჭრის გზები

კატალონიური კლუბი იმ პრობლემებს ასაჯაროებს, რომლებსაც უსმან დემბელე "ბარსელონაში" ადაპტაციის დროს წააწყდა.

ადგილობრივი ჟურნალისტების ცნობით, 20 წლის ფრანგ ფეხბურთელს, ბარსელონაში გატარებული პირველი რამდენიმე კვირის განმავლობაში, არაერთი პრობლემა ჰქონდა, რომლებიც ნელ-ნელა გვარდება.

დემბელემ კლუბის წარმომადგენლებს სთხოვა, მისთვის 3 სახლი მოეძებნათ: ერთი უშუალოდ მისთვის და მისი ძმისთვის, ერთი დედისთვის და ერთიც მამისთვის. საქმე ისაა, რომ დემბელეს მშობლებს ერთმანეთთან პრობლემები აქვთ და მათ ურჩევნიათ ერთად არ იცხოვრონ.

"ბარსელონამ" დემბელესთვის შესაფერის 3 სახლი ერთმანეთთან ახლოს ვერ იპოვა. შედეგად, ფეხბურთელსა და მის ოჯახს ერთად ცხოვრება მოუხდათ და ოჯახურმა პრობლემებმა ახალგაზრდა ფეხბურთელის ცხოვრებაზე გავლენა მოახდინა.

სერიოზული პრობლემა იყო დემბელეს კვებაც. ფეხბურთელი, ისევე, როგორც მისი ოჯახის წევრები, მუსლიმები არიან და ისინი მხოლოდ ჰალალ საკვებით (ისლამური კანონებით დაშვებული საკვები) იკვებებიან. დემბელეს არ მოსწონდა ის საკვები, რომელსაც "ბარსელონას" ბაზაზე ამზადებენ და ის შინ, არაჯანსაღად იკვებებოდა.

ცოტა ხნის წინ, "ბარსელონამ" დემბელესთვის მზარეული დაიქირავა, რომელიც მას ჰალალ საკვებს დაუმზადებს როგორც კლუბის ბაზაზე, ასევე სახლში.

პრობლემაა ენის ბარიერიც. დემბელე, ესპანური ენის არცოდნის გამო, მხოლოდ სამუელ უმტიტისა და ლუა დინს ეკონტაქტება, გუნდის წამყვან ფეხბურთელებთან კი მას კომუნიკაცია უჭირს.

ბოლო ვარჯიშებზე გამოჩნდა, რომ ფრანგი ფეხბურთელი უფრო ბედნიერია. მას თანაგუნდელებიც უფრო ხშირად ეკონტაქტებიან.

ივარაუდება, რომ პრობელემების ნაწილის მოგვარება ერნესტო ვალვერდეს საშუალებას მისცემს ფეხბურთელი უფრო ხშირად გამოიყენოს. დემბელეს, "ჟირონასთან" მატჩში, სასტარტო შემადგენლობაში ველით, მომდევნო თამაშები კი გადაწყვეტს, ვიხილავთ თუ არა მას "ჩელსისთან" ძირითადში.