Bild: დორტმუნდის "ბორუსია" პაკოს სანაცვლოდ 23 მილიონ ევროს გადაიხდის

გერმანული პრესის თანახმად, დორტმუნდის "ბორუსიაში" პაკო ალკასერის თამაშით კმაყოფილები არიან და უკვე გადაწყვეტილი აქვთ, ფეხბურთელის უფლებები საბოლოოდ გამოისყიდონ.

შეგახსენებთ, რომ ესპანელი ფორვარდი "სიგნალ იდუნა პარკზე" გასულ აგვისტოში, იჯარის წესით გადაბარგდა. დორტმუნდს მისი გამოსყიდვა 23 მილიონ ევროდ შეუძლია, +5 მილიონი ევრო ბონუსების სახით.

25 წლის ფეხბურთელი ბუნდესლიგაში შესანიშნავ თამაშს აჩვენებს და რაც მთავარია, გოლებიც ბლომად გააქვს. ამან კი გერმანული კლუბის გამორჩეული ფანების სიყვარულიც მარტივად მოაპოვებინა.

სტატისტიკა მართლაც გასაოცარია, სეზონში ჩატარებულ 200 წუთში (გუშინდელი მატჩის ჩათვლით, ესპანეთის მაისურით, სადაც პაკომ დუბლი გაიფორმა) მან 9 გოლის გატანა შეძლო, აქედან 7 "ბორუსიას" მაისურით, რაც მხოლოდ უმაღლესი კლასის ფორვარდებისთვის დამახასიათებელი შედეგია.

ამ ყველაფერმა კი კლუბის მესვეურებს გადააწყვეტინა, რომ პაკოს უფლებები სრულად გამოისყიდონ, კატალონიურ გრანდს 23 მილიონი ევრო გადაუხადონ და ამით პაკო გუნდში მესამე ყველაზე ძვირადღირებულ მოთამაშედ აქციონ, გიოტზესა და როისის შემდეგ.

გერმანული გაზეთი ალკასერის შესაძლო ხელფასზეც წერს, რაც "ბარსელონაში" მის ანაზღაურებას მნიშვნელოვნად აღემატება - 8 მილიონი ევრო.

საინტერესოა, რომ ეს შეთანხმება აგვისტოში კლუბისთვის ძალიან მომგებიანი ჩანდა, იმ ყველაფრის გათვალისწინებით, რომ პაკო სუარესს კონკურენციას ვერ უწევდა და ნათელი იყო, სათამაშო დროის მხრივ ბევრი არაფერი შეიცვლებოდა. მიუხედავად ამისა, ახლა ყველაფერი ასე ნათელი აღარაა. 23 მილიონი ევრო (თანაც 5 ნაწილად გაყოფილი) ევროპული ფეხბურთის ერთ-ერთი ყველაზე დიდი სურპრიზისთვის და ერთ-ერთი საუკეთესო სტატისტიკის მქონე ფეხბურთელისთვის არც ისე დიდ თანხად ჟღერს.

სამწუხაროდ, კატალონიელებს ამ შემთხვევაში ხელები შეკრული აქვთ. მათ არაფრის გაკეთება აღარ შეუძლიათ, თუ რა თქმა უნდა "ბორუსიამ" პაკოს ყიდვა არ გადაიფიქრა, რაც ახლანდელი გადმოსახედიდან შეუძლებლად გვეჩვენება.