ნეიმარი - "ბარსელონაში", დემბელე - "პარი სენ-ჟერმენში"?

ესპანურ პრესაში გავრცელებული ინფორმაციის თანახმად, "ბარსელონას" ფრანგული "პარი სენ-ჟერმენის" ბრაზილიელი თავდამსხმელის, ნეიმარის დაბრუნება უნდა, რის გამოც კატალონიური კლუბი მზადაა, უსმან დემბელეც დათმოს.

კატალონიური Mundo Deportivo-ს ცნობით, "ბარსელონა" მზადაა, ნეიმარში გარკვეული თანხა გადაიხადოს და ტრანსფერში ფრანგი შემტევი უსმან დემბელე ჩართოს, რომლის სანაცვლოდაც კატალონიელებმა გასულ წელს "დორტმუნდს" 105 მილიონი ევრო გადაუხადეს.

ნეიმარის "ბარსელონაში" შესაძლო დაბრუნებაზე ინფორმაციამ ბოლო დროს არაერთხელ გაიჟღერა. კატალონიურ გუნდში კვლავ თამაში უნდა თავად 26 წლის ფეხბურთელსაც.

რაც შეეხება დემბელეს, კლუბში მისი თამაშით უკმაყოფილოები არიან და მასთან განსაშორებლად მზად არიან. ამას ემატება ისიც, რომ 21 წლის ფეხბურთელმა "ინტერთან" თამაშისთვის წინასამატჩო შეკრებაზე 25 წუთით დაიგვიანა, რის გამოც უსმანს "ნერაძურისთან" არცერთი წუთი არ უთამაშია.