Corriere dello Sport: მალკომი, შესაძლოა, "რომას" შეუერთდეს

იტალიური მედიის ცნობით, ბრაზილიელი ახალგაზრდა კატალონიურ გრანდში გადასვლას ნანობს და რომაელთა სპორტულ დირექტორს, მონჩის თავისი სურვილის შესახებ უკვე შეატყობინა.

ტრანსფერი, რომელიც გასულ ზაფხულში "ბარსელონას" ბოლო წამს საქმეში ჩართვამ ჩაშალა, შესაძლოა მაინც შედგეს.

მიუხედავად იმისა, რომ მალკომი განაცხადში ხშირად ვერ ხვდება, ვალერდეს მისი გაშვება არ სურს და თავად ფეხბურთელმაც საჯაროდ დააფიქსირა თავისი მიზანი - წარმატების მიღწევა "ბარსას" მაისურით. ამავდროულად, კლუბი არ გამორიცხავს 21 წლის შემტევის იჯარით გაშვების შესაძლებლობას.

თუმცა, გასული ზაფხულის სატრანსფერო ფანჯრიდან გამომდინარე, მალკომის "რომაში" ტრანსფერი ძალიან რთული წარმოსადგენია. შეგახსენებთ, რომ "ბორდოსა" და იტალიურ კლუბს მაშინ ყველაფერი შეთანხმებული ჰქონდათ, თუმცა ბოლო წამს საქმეში "ბლაუგრანა" ჩაერთო და ფეხბურთელიც ფაქტობრივად ჰაერიდან მოაბრუნეს. ამ ყველაფრის გამო კი ცხადია, რომაელთა და ფეხბურთელის წარმომადგენლებს შორის ყველანაირი კავშირი გაწყდა.