ერნესტო ვალვერდე: მესი ყოველთვის გვაოცებს

"ბარსელონას" მთავარმა მწვრთნელმა, ერნესტო ვალვერდემ, "ლივერპულთან" მატჩი (3:0) შეაფასა და ლიონელ მესისთვის საქებარი სიტყვები არ დაიშურა.

"ეს შესანიშნავი შედეგია ძალიან ძლიერი მეტოქის წინააღმდეგ. შესვენებაზე გარკვეული ცვლილებები გავაკეთეთ. ისინი მეორე ტაიმში თავს არ ზოგავდნენ.

ანგარიშზე არასდროს ვფიქრობ. ფრე 1:1-ც, შესაძლოა, კარგი შედეგი ყოფილიყო - ყველაფერი თამაშის მიმდინარეობაზეა დამოკიდებული.

დღევანდელ მატჩში უნდა გვებრძოლა. ყველაფერი გავაკეთეთ, რათა გოლი არ გაგვეშვა.

"ლივერპული" შესანიშნავი გუნდია. წინ 90 წუთია და ვიცით, რა გველოდება.

გასულ სეზონში 1/4-ფინალში 3-გოლიანი უპირატესობა გვქონდა, მაგრამ გამოვვარდით. ასე რომ, ინტრიგა ჯერ კიდევ ცოცხალია. "ლივერპული" ცხოვრებას გაგვირთულებს.

ვიცით, რა შეუძლია მესის, მაგრამ ის ჩვენს გაკვირვებას არ წყვეტს. ის ჩვენი კაპიტანია. ის ფეხბურთელია, რომელიც აკონტროლებს და ცვლის თამაშის რიტმს.

ლეომ კვლავ გადაწყვიტა თამაშის შედეგი და მოგვაგებინა. მან ამჯერადაც დაამტკიცა, რომ გუნდის ლიდერია.

მესი ყოველთვის გვაოცებს. საჯარიმო შორეული იყო და არ ვიცოდი, გაიტანდა თუ არა.

არ ვიცი, როგორ აკეთებს ლეო ამას, მაგრამ ის ყოველთვის იჩენს თავს იმ მომენტში, როდესაც ყველაზე მეტად გვჭირდება.

მესი მეტოქეებს მუდმივი შიშის გრძნობის შთაბეჭდილებას უქმნის." - ციტირებს ვალვერდეს სიტყვებს UEFA-ს ოფიციალური ვებგვერდი.