"ბარსელონამ" 3 ტრანსფერი დაგეგმა

"ბარსელონამ" 2020/21 წლების სეზონისთვის მზადება უკვე დაიწყო და კატალონიელებმა სამი სატრანსფერო სამიზნეც განსაზღვრეს.

ESPN-ის ინფორმაციით, "ბლაუგრანამ" "ნაპოლის" ესპანელი ნახევარმცველი ფაბიან რუისი, "ბეტისის" ბრაზილიელი მარჯვენა მცველი ემერსონი და ზაგრების "დინამოს" ესპანელი შემტევი დანი ოლმო მოინიშნა.

ფაბიან რუისს "ბარსელონა" დიდი ხანია აკვირდება. ცოტა ხნის წინ, ერიკ აბიდალი "ნაპოლის" თამაშს დაესწრო და 23 წლის შუახაზელზე კარგი შთაბეჭდილებაც შეიქმნა.

20 წლის ბრაზილიელი მარჯვენა მცველის, ემერსონის უფლებების ნახევარი "ბარსელონას" ეკუთვნის. გასულ ზაფხულში, "ბარსამ" და "ბეტისმა", ემერსონი "ატლეტიკო მინეიროდან" 12 მილიონ ევროდ შეიძინეს. კლუბებმა 6-6 მილიონი გადაიხადეს, "ბარსას" კი შეუძლია "ბეტისს" 6 მილიონი გადაუხადოს და ახალგაზრდა ფეხბურთელი გადაიბიროს. ამის შანსები იზრდება იმის გათვალისწინებით, რომ ემერსონი ლა ლიგაში კარგ შთაბეჭდილებას ტოვებს.

დანი ოლმოს "ბარსელონაში" დაბრუნების შესახებ ცნობები დიდი ხანია ვრცელდება. ESPN-ს ცნობით, 21 წლის ფეხბურთელი კატალონიელთა სამიზნეთა რიგებში მომდევნო ზაფხულშიც იქნება. ოლმო, რომელმაც არაერთი ევროპული გრანდის ყურადღება მიიქცია, "ბარსელონას" აკადემიაში 2007-2014 წლებში ირიცხებოდა.