ჯორჯო კიელინი: ალკოჰოლი ვიდალის სუსტი წერტილი იყო
"იუვენტუსის" ლეგენდარულმა ფეხბურთელმა, ჯორჯო კიელინიმ, ავტობიოგრაფიული წიგნი გამოსცა, რომელშიც მკითხველს ყოფილი თანაგუნდელის, არტურო ვიდალის, შესახებაც უამბობს. იტალიელი წერს, რომ არტუროს დისციპლინასთან ჰქონდა პრობლემები.
"ხანდახან, იგი ნორმაზე მეტს სვამდა, ყველაფერი ვიცოდი. შეიძლება ითქვას, რომ ალკოჰოლი მისი სუსტი წერტილი იყო, თუმცა ამით მისი სპორტული და პიროვნული თვისებები ეჭვქვეშ არ დგება.
სისუსტე ადამიანური ბუნების ნაწილია. მთავარია, რა გავლენა აქვს მის მიერ გამოწვეულ შედეგებს გუნდზე. წელიწადში რამდენჯერმე "დიდი" არტურო ვარჯიშზე არ ცხადდებოდა და როდესაც მოდიოდა, ამბობდა, რომ ძალიან ბედნიერი იყო".
მან, აგრეთვე, აშშ-ში მომხდარი ფაქტიც გაიხსენა
"შეერთებული შტატების ტურში, უკანასკნელი ვარჯიშის წინა ღამეს, განგვათავისუფლეს. დილით კი, არტურო არსად ჩანდა. შემდეგ, ლოგინში იპოვეს და ძალით ააყენეს. ვარჯიშზე კი თავიდან მთვრალს ჰგავდა, ბურთს საერთოდ ვერ ხედავდა. კონტეს მისი დასჯა სურდა, თუმცა ვარჯიშის ბოლოს გიჟივით დარბოდა და ყველაზე უკეთ გაისარჯა.
რა უნდა უთხრა ასეთ ადამიანს, რომელსაც ყველაფერთან ერთად, გუნდისთვის ბედნიერებაც მოაქვს?", - წერს 35 წლის კიელინი.
ვიდალი, რომელიც დღეს "ბარსელონას" წევრია, "ბებერი ქალბატონის" ღირსებას, კიელინისთან ერთად, 2011-2015 წლებში იცავდა.
ამ სიახლეზე კომენტარები გათიშულია.
კომენტარები [ 6 ]