უეინ რუნი: ჟერარ პიკე "მანჩესტერ იუნაიტედში" დაჩაგრეს

"მანჩესტერ იუნაუტედის" ლეგენდა, უეინ რუნი "ბარსელონას" ცენტრალური მცველის, ჟერარ პიკეს შესახებ საუბრობს.

"2007 წელს, "ბოლტონთან" გასვლით მატჩში, პიკეს "მანჩესტერული" კარიერა მეტწილად დასრულდა. ვფიქრობ, ის დაჩაგრეს, როცა ფერგიმ (სერ ალექს ფერგიუსონი) გადაწყვიტა, რომ მისი ფიზიკური მდგომარეობა პრემიერ ლიგისას არ შეესაბამებოდა", - წერს "შრეკი" The Sunday Times-ში.

როგორც ჩანს, ლეგენდარული ბრიტანელი ფეხბურთელი 2007 წლის 24 ნოემბერში გამართულ დაპირისპირებას გულისხმობს, სადაც ჟერარმა 60 წუთზე ნაკლები ითამაშა და შემდეგ ანდერსონმა შეცვალა. ამის შემდეგ, კატალონიელმა ინგლისის ჩემპიონატში მხოლოდ 4 შეხვედრა ჩაატარა.

პიკემ, 1997-2004 წლების "ლა მასიაში" გატარების შემდეგ, "ნისლიან ალბიონს" მიაშურა და 2004 წელს "წითელი ეშმაკების" რიგებში პროფესიონალური კარიერა დაიწყო, თუმცა, რიო ფერდინანდთან და ნემანია ვიდიჩთან კონკურენციის პირობებში, "მანკუნიანელთა" შოტლანდიელი თავკაცი ჟერარს დიდ სათამაშო დროს არ აძლევდა და საბოლოოდ, 2008 წელს "ბარსამ" იგი 5 მილიონ ევროდ დაიბრუნა.

შედეგად, კატალონიელმა კარლეს პუიოლთან ერთად შესანიშნავი დაცვის ხაზი ჩამოაყალიბა. 33 წლის მოთამაშემ 4 წელიწადში, "მანჩესტერის" შემადენლობაში, მხოლოდ 23 მატჩში მიიღო მონაწილეობა და 2 გოლი მიითვალა. "ბარსაში" კი, ამჟამად კლუბის მე-3 კაპიტანმა 531 დაპირისპირებაში მეტოქეთა კარის ბადე 46-ჯერ შეარხია. ასევე, ლეგენდარული მცველი ერთ-ერთი ყველაზე ტიტულიანი ფეხბურთელია - უამრავ თასთან ერთად "ბლაუგრანას" რიგებში მან 9 ლა ლიგა და 3 ჩემპიონთა ლიგაც მოიგო.