მარტინ ბრეითუეიტი ლისაბონში გაემგზავრება - Diario AS

მოგეხსენებათ, კატალონიის "ბარსელონა" ჩემპიონთა ლიგის ეგიდით, მიუნხენის "ბაიერნთან" ლისაბონში გასამართი მეოთხედფინალური დაპირისპირებისათვის ემზადება.

Diarios AS-ის ჟურნალისტის, ხავი მიგელის ინფორმაციით, პორტუგალიის დედაქალაქში მარტინ ბრეითუეიტიც გაემგზავრება, რომელსაც ევროპის უპრესტიჟულეს ტურნირზე თამაშის უფლება არ აქვს.

თუმცა, ხსენებული საკითხი გარკვეულმა მიზეზებმა განაპირობა. წყაროს თანახმად, თუ მატჩის დაწყებამდე 24 საათით ადრე ჩასატარებელი PCR ტესტის შედეგად კატალონიელთა რამდენიმე მოთამაშეს COVID-19 დაუდასტურდება, დანიელ ფეხბურთელს ჩემპიონთა ლიგის განაცხადში დაარეგისტრირებენ, რის შემდეგადაც იგი "რეკორდმაისტერთან" ასპარეზობას შეძლებს.

როგორც ცნობილია, UEFA-ს პროტოკოლის მიხედვით, იმისათვის, რათა შეხვედრამ დათქმულ დროს აიღოს სტარტი, გუნდებს სულ მცირე, 13-13 ჯანმრთელი ფეხბურთელი უნდა ჰყავდეთ.