"ბარსელონა" vs "ბეტისი" | მატჩისწინა მიმოხილვა

ლა ლიგის მე-9 ტურის შეხვედრას "ბარსელონა" საშინაო კედლებში სევილიის "რეალ ბეტისის" წინააღმდეგ გამართავს. 

კატალონიელები ჩემპიონთა ლიგაზე წარმატებული გამოსვლის მიუხედავად, ლა ლიგაში ძალიან მძიმედ გამოიყურებიან და ჩატარებულ 6 შეხვედრაში მხოლოდ 8 ქულა აქვთ მოპოვებული. ამასთანავე, ლა ლიგის ეგიდით გამართულ ბოლო 4 შეხვედრაში გამარჯვება არ უზეიმიათ. შესაბამისად, სანაკრებო პაუზამდე გუნდს გამოფხიზლება და უმნიშვნელოვანესი 3 ქულის მოპოვება მართებს.

გუნდების დანაკლისი

"ბარსელონას" სამუელ უმტიტი, ფილიპე კოუტინიო და რონალდ არაუხო ტრავმის გამო არ ეყოლება.

რონალდ კუმანმა განაცხადში მათ ნაცვლად "ბარსა ბ-ს" მოთამაშეები, კონრად დე ლა ფუენტე, ოსკარ მინგესა და არნაუ ტენასი შეიყვანა.

რაც შეეხებათ სევილიელებს, მათი დანაკლისი უფრო შესამჩნევია. "ბეტისს" გუნდის მთავარი ვარსკვლავი ნაბილ ფეკირი ტრავმის გამო დააკლდება. ფრანგთან ერთად "კამპ ნოუზე" ვერც ანდრეს გუარდადო, ხაუნმი, ვიქტორ კამარასა და დანი მარტინი ითამაშებენ.

მწვრთნელების კომენტარები

რონალდ კუმანი: "ნებისმიერი თამაში მნიშვნელოვანია. ეს სიტუაციაზე არაა დამოკიდებული. "ბეტისი" კარგი გუნდია და წინ რთული თამაში გველის. ოთხშაბათს დაშვებული შეცდომები უნდა გამოვასწოროთ, განსაკუთრებით დაცვაში. ამ თამაშისთვის მზად ვართ."

მანუელ პელეგრინი: "მათ დიდი უპირატესობა ექნებათ. მთავარი მიზანი ბურთის ფლობისას ჩვენი შანსების მაქსიმალურად გამოყენებაა. ისეთივე შემართებით თამაშს ვაპირებთ, როგორც "რეალთან" და "ატლეტიკოსთან. ინიციატივა უნდა გამოვიჩინოთ და შანსები გოლებად ვაქციოთ."

სავარაუდო თერთმეტეულები

"ბარსას" XI: ტერ შტეგენი, ლანგლე, პიკე, ალბა, დესტი, დე იონგი, პიანიჩი, ფატი, მესი, დემბელე, გრიზმანი.

"ბეტისის" XI: ბრავო, ემერსონი, მანდი, ბარტრა, მორენო, კარვალიო, როდრიგესი, ხოაკინი, კანალესი, ტელიო, სანაბრია.

ურთიერთშეხვედრები და საინტერესო სტატისტიკა

"ბარსელონამ" "ბეტისის" წინააღმდეგ გამართული ბოლო 5 შეხვედრიდან 4-ში იმარჯვა და მხოლოდ ერთხელ დამარცხდა.

უკანასკნელ მატჩში კატალონიელებმა გამარჯვება სტუმრად მოიპოვეს. მათ მეტოქე ანგარიშით 3-2 დაამარცხეს. ბარსას მხრიდან გოლები კლემან ლანგლემ, ფრენკი დე იონგმა და სერხიო ბუსკეტსმა გაიტანეს.

"ბლაუგრანას" ბოლო მარცხი 2018 წელს ფიქსირდება. მათ შეხვედრა "კამპ ნოუზე" დათმეს, ანგარიშით 3-4.

ანდალუსიელების წინააღმდეგ სახლში გამართული ბოლო 11 შეხვედრიდან კატალონიელებმა მეტოქეს 3 ან მეტი გოლი 10-ჯერ გაუტანეს.

მატჩის პროგნოზი

Sportsmole მიიჩნევს, რომ შეხვედრა მასპინძლების სასარგებლოდ დასრულდება, ანგარიშით 2-1.

Whoscored-ის ვერსიით, კატალონიელები სტუმრებს ორბურთიანი სხვაობით დაამარცხებენ, 3-1.

შეხვედრა 7 ნოემბერს, თბილისის დროით 19:15 საათზე დაიწყება.