ლაპორტას "კლასიკოები" - რონალდინიოს აპლოდისმენტები და ტრიუმფალური 6-2

ჟოან ლაპორტა პრეზიდენტის რანგში უკვე მეორედ უხელმძღვანელებს "ბარსელონას", შაბათს გასამართი "ელ კლასიკო" კი მისთვის პირველი იქნება დიდხნიანი პაუზის შემდეგ. ლაპორტა კლუბის პრეზიდენტის თანამდებობას 2003-2010 წლებში იკავებდა, ამ პერიოდის განმავლობაში ბევრი დასამახსოვრებელი "კლასიკო" და გამორჩეული მომენტები იყო.

ლაპორტას პირველ "კლასიკო" მარცხით დასრულდა.  "ბლაუგრანამ" თამაში 1:2 დათმო. 2005 წლის 19 ნოემბერს კი "ბარსელონასა" და "რეალს" შორის ერთ-ერთი გამორჩეული დაპირისპირება გაიმართა. კატალონიელებმა შეხვედრა 3:0 მოიგეს, "სანტიაგო ბერნაბეუზე" შეკრებილი ქომაგი კი რონალდინიოს ფეხზე წამოუდგა და აპლოდისმენტებით დააჯილდოვა. 

"სასიამოვნო და საამაყოა, როცა მეტოქე გუნდის ქომაგები შენს თამაშს აღიარებენ. ეს იმ მატჩთაგანი იყო, რომელიც არ გინდა დასრულდეს", - ციტირებს ლაპორტას სიტყვებს Marca.

ტრიუმფალური 6:2

ლაპორტას პრეზიდენტობის პერიოდში ალბათ, ყველაზე დასამახსოვრებელი "რეალის" კარში გატანილი 6 გოლი იყო. პეპ გვარდიოლას ხელმძღვანელობით კატალონიელებმა "სანტიაგო" ბერნაბეუზე 6 გოლის გატანა შეძლეს. სტადიონზე შეკრებილი 80 000 მაყურებლის წინაშე "ბლაუგრანამ" საფეხბურთო სანახაობა დადგა. ლიონელ მესიმ და ტიერი ანრიმ დუბლი შეასრულეს, თითო გოლი კი კარლეს პუიოლმა და ჟერარ პიკემ გაიტანეს.