"გეგმა ბ არ მქონდა" - მარტინ ბრეითუეიტის ინტერვიუ

დრო, რომელიც ეტლში გავატარე? ამასთან დაკავშირებით ბევრ მოგონებას არ ვინახავ, ძალიან ცუდი პერიოდი იყო. წარმოიდგინეთ, უყურებთ, როგორ თამაშობენ სხვა ბავშვები, დარბიან, იცინიან... ჩემთვის ეს რთული იყო. 
მახსოვს, სირცხვილის გრძნობა მქონდა, რადგან განსხვავებული ვიყავი. სასიამოვნო არაა, როცა ყურადღებას ამით იპყრობ. 

ყოველთვის მინდოდა, ფეხბურთელი გავმხდარიყავი. სხვა არაფერზე მიფიქრია, გეგმა ბ არ მქონდა. როცა გეგმა ბ არ გაქვს, მიზანზე კონცენტრირებაში ხელს ვერაფერი გიშლის. 
დანიაში თავმდაბალი ხალხი ცხოვრობს, მათ დიდი ოცნებები არ აქვთ. მამაჩემი ამერიკაში გაიზარდა და მეც ჩემი ამერიკული მხარის თვისებებს ვავლენ: ვოცნებობ, მინდა ყველაფერი გავაკეთო იმისთვის, რომ მსოფლიო დავიპყრო. 

ჩემი შვილი ვარჯიშიდან მომყავდა, როცა აგენტმა დამირეკა და მითხრა, რომ "ბარსელონა" იყო დაინტერესებული. მან თქვა, რომ "ბარსას" ჩემი დამატება ძალიან, ძალიან უნდოდა. 
შესანიშნავი გრძნობა იყო, მაგრამ კარგად ვიცი, რომ ფეხბურთში მხოლოდ დაინტერესება არაფერს ნიშნავს. აქედან კონტრაქტის გაფორმებამდე გრძელი გზაა გასავლელი. 

სანამ მოლაპარაკებები მიმდინარეობდა, ვცდილობდი ამაზე არ მესაუბრა. საერთოდ არ ვარ ის ადამიანი, რომელიც ბევრ საიდუმლოს ინახავს. ყველაფერზე ღიად ვსაუბრობ და როცა სატელეფონო ზარების დამალვა დავიწყე, ჩემი ცოლი ალბათ იფიქრებდა, რომ რაღაც რიგზე არ იყო. 
ბოლოს ვუთხარი, რომ მისთვის სიურპრიზი მქონდა, მაგრამ მან უბრალოდ გაიღიმა და მიპასუხა: "ვიცი, რაც უნდა მითხრა..." მოსალოდნელი ტრანსფერის გამო უკვე უამრავი მესიჯი ჰქონდა მიღებული. 

"ბარსელონაში" დაინახეს, რომ იმაზე უფრო მაღალ დონეზე შემეძლო თამაში, ვიდრე მაშინ ვიყავი. მათ მითხრეს, რომ სწორედ ის თვისებები მქონდა, რაც დიდ კლუბში დიდი წნეხის ქვეშ თამაშისთვის იყო საჭირო. როგორც აღმოჩნდა, ისინი მართლები იყვნენ. 

ვფიქრობ, როცა ირგვლივ უმაღლესი კლასის პროფესიონალები გყავს, ეს გიბიძგებს იმისკენ, რომ შესაძლებლობების მაქსიმუმი გამოავლინო. ვარჯიშის დროს დეტალებს ვაკვირდები და ყველაფერი, რასაც ისინი აკეთებენ, საოცარია. ვამჩნევ, რომ თამაში გავაუმჯობესე და უფრო მაღალ დონეზე გადავინაცვლე.