ბარსელონას დონარუმას შეძენა არასდროს სურდა - რატომ ინტერესდებოდნენ კატალონიელები იტალიელით
Sport-ის ინფორმაციით, კატალონიის "ბარსელონა" "მილანის" ახალგაზრდა მეკარის, ჯანლუიჯი დონარუმას შეძენას, რომელიც პსჟ-ში გადასვლასთან ახლოსაა, სერიოზულად არასდროს განიხილავდა.
აღნიშნული წყაროს ცნობით, "ლურჯ-ბროწეულიფერები" ამით, უბრალოდ, იტალიელის აგენტს, მინო რაიოლას ეხმარებოდნენ, რომ ფეხბურთელის ფასი აეწია - საბოლოოდ, "პარი სენ-ჟერმენმა" მისთვის მაღალი ხელფასის გადახდა გადაწყვიტა.
ნახსენები გამოცემის თანახმად, ამან, შესაძლოა, მომავალში "ბლაუგრანას" რაიოლას კლიენტების გაფორმებაში ხელი შეუწყოს. ცნობისთვის, ერლინგ ჰოლანდისა და მატიას დე ლიხტის წარმომადგენელი სწორედ მინოა.
გარდა ამისა, როგორც Mundo Deportivo იტყობინება, კატალონიურ გრანდს გუნდის პირველ მეკარესთან, მარკ-ანდრე ტერ შტეგენთან სიტუაციის გართულება არ სურს და გერმანელს სრულად ენდობა.
ცოტა ხნის წინ პარიზულმა კლუბმა "ბარსას" ჯორჯინიო ვეინალდუმის ტრანსფერი ჩაუშალა, დონარუმას შემთხვევაში კი, შეიძლება ითქვას, ჟოან ლაპორტამ ნასერ ალ-ხელაიფის სამაგიერო გადაუხადა.
ამ სიახლეზე კომენტარები გათიშულია.
კომენტარები [ 11 ]